АДОЛАТСИЗЛИКЛАРДАН ТЎЙГАН ХАЛҚ ОХИРИ ПОРТЛАЙДИ! МАНСАБДОРЛАР ЭСА ШУНИ КУТАЯПТИ!

Шу йилнинг 3 июль кунидаги менга нисбатан сохта ва уюштирилган айбловга кўра ноҳақ чиқарилган суд қарорини ноқонуний тартибда бажариш мақсадида (чунки хатлов қоғозида ҳовли жой ҳам ундаги жиҳозлар ҳам менга тегишли эмаслиги ва мен бу уйда қонуний рўйхатда турмаслигимни, ижарада яшаётганлигимни ёзма равишда баён этганман.) 2 нафар ҳимоясиз болам яшаб турган уйимга 15 нафар ИИБ ходими, ўт ўчириш машиналари ва ходимлари, тез ёрдам машиналари, буни қарангки бирор марта ҳам ишсиз, ногирон ёлғиз аёлнинг оилавий аҳволини мутлақо қўллаб-қувватламаган МФЙ ходимлари суд ижрочиси М.Жўраевнинг ноқонуний ҳатти-ҳаракатларига шерик бўлиб бостириб кириб келишган эди.

Шу жараёнда ижрочи М.Жўраев ўғлимнинг қўлидаги у билан ўртамиздаги савол-жавоб тасвири туширилган, ўсмир ўғлимга тегишли бўлган фотокамерани куч ишлатиш зўравонлик билан юлиб олиб, уйга киришига уйни эгасига тегишли бўлган жиҳозларни олиб кетсангизлар эгаси бизни кўчада қолдиради, деб тўсқинлик қилаётган коллежни шу йил тамомлаган қизимга нисбатан куч ишлатиб, яъни куч билан итариб юбориб бошини ғурра қилганлиги, лабини ёрганлиги каби қатор ноқонуний ҳатти-ҳаракатлари юзасидан республика юқори турувчи идораларининг барчасига ва вилоят, туман прокуратураларига шикоят йўллаган эдим.

Буни қарангки, “Қўрқоқ олдин мушт кўтарар” қабилида иш тутган ижрочи ва унга шерик ҳуқуқ-тартибот ходимлари уялмай-нетмай коллежни шу йил тамомлаб, ишга ҳам жойлаша олмай хуноб бўлиб юрган қизимга нисбатан тўҳмату бўҳтон уюштиришиб, М.Жўраев “Қизи қўлимни тишлаб олди” деган туҳмат билан шикоят келтирган, туман прокуророри К.Жусипбеков эса бу ишни катта ёрдамчиси А.Кенжаевга топширган экан.

А.Кенжаев эса мени шикоятларимни четга суриб ташлаб фақатгина ижрочини шикоятини (яъни жисман кучсиз ногирон аёл ва унинг отасиз, ҳимоясиз 2 нафар фарзандининг поймол қилинаётган ҳуқуқларини ҳимоялаш ўрнига) ўрганиш мақсадида 7 июль куни менга қўнғироқ қилди. Мен унга Тошкентдан қайтаётганимни, уйда эмаслигимни айтганимда у вазиятдан фойдаланиб, ижрочи билан биргаликда уйда ҳимоясиз ёлғиз қолган фарзандларимни устига бостириб бориб пўписа қилиб, уларни қўрқитишган эди.

Хуллас, А.Кенжаев ҳам мени шикоятимни ўрганмай, яъни фуқаролик ҳуқуқларимни поймол қилиб, М.Жўраевни шикояти юзасидан уйимдан мажбурий тартибда туман ИИБЖҚБ ходимлари томонидан олиб кетишиб, туман прокуратурасида мендан тушунтириш хати ёздириб олишди.

Буни қарангки, шунда бор ҳақиқатни ёзаётганлигим сабаб, А.Кенжаев ўзаро келишув таклиф қилиб, “Мен раҳбарларим билан маслаҳатлашиб олай, опа, душанбада келиб давом эттирасиз ” дея қўлимдан ҳали тугалланмаган тушунтириш хатимни олиб қолди.

Шу куйи ҚОНУН ҲИМОЯЧИЛАРИнинг (аслида бу юксак вазифа эмас булар учун, балки ўз манфаатлари йўлида ишлатадиган қурол, бир ниқоб) янги ўйинлари бошланди. Яъни, эндигина коллежни тамомлаб, келажагини яратишга интилаётган қизимга ҳужум бошлашди. “Опа, қоғозда келтирилган барча айбни бўйнингизга олмасангиз, қизингизни жавобгарликка тортиб, судланди, қилишга мажбурман. М.Жўраевга ҳам айтаман, судда даъвоим йўқ, деб айтади. Қолаверса, жиҳозлар ҳам эгасига қайтарилади.” Қабилидаги ҳам алдов ҳам пўписа билан бўйнимга олишга мажбур қилишди.

Шунда ҳам “Шу куни кучли депрессия, стресс ҳолатида эдим, эслай олмайман.” қабилидаги кўрсатма билан 24 июль куни ЖИБ бўйича Кармана туман судида судья Ражабов томонидан суд ўтказилди ва менга нисбатан огоҳлантириш берилди. Шундан сўнг эса буни қарангки, А.Кенжаевнинг “иши битди, эшаги сувдан ўтди”ю, шу куйи мени муаммоларимни ортиқча шикоятбозликларсиз туманнинг ўзида биргаликда ечиш фикрини унутди. Шикоят аризаларим на қонуний ўрганилди на ечим топилди. На ёзма ва на оғзаки жавоб олмадим.

Шу ўринда ҳақли савол туғилади: туман прокурори катта ёрдамчиси А.Кенжаев, вилоят ИИБЖҚБ масъул ходими З.Ўроқов, ижрочи ходим М.Жўраев каби мансабдорларнинг хизмат лавозимларини суистеъмол қилиб, фуқароларнинг ҳуқуқларини поймол қилиш ҳолатларига қачонгача қонуний чора кўрилмаслик ҳолати давом этар экан?

Мен каби минглаб жабрдийда фуқаролар қачонгача Қонунсизликдан эзилиб яшар эканлар? Адолатсизликка учраётган ўша минглар тилида фақатгина бир сўзни эшитасан бугун “ҚОНУН ҲАМ АДОЛАТ ҲАМ ҚОЛМАДИ ЎЗИ!”

Халқда бу ишончсизликни пайдо бўлишига сабаб бўлаётган манфаатпараст мансабдорларнинг ҳукуматимиз томонидан юксак ишонч билан топширилган хизмат лавозимларидан фойдаланиб суистеъмол қилаётганлари эмасмикан? Нега республика мутасаддилари шу каби мансабдорларни қонуний жавобгарликка тортишни ўйлашмайди? Бу аҳволда жамиятимиз равнақ топиш ўрнида жарга қуламасмикан? Нега мамлакат, жамият тақдири ҳеч бир мутасаддини қизиқтирмайди?

Шу қадар разиллик билан 3 йилдирки ишсиз қўйилган, 2 нафар фарзандининг ягона таъминотчиси, жисман ногирон аёлнинг бор йўқ даромади ногиронлик нафақасигача талон-тарож қилаётганлар нега Қонун номи билан иш кўриши керак? Қайси бир қонунларимиз бу каби разилликни қўллаб-қувватлайди?

Айни пайтда менга тегишли бўлмаган ижарада турган уйимдан зўравонлик йўли билан олиб кетилган жиҳозларни қаердан тўлашим керак? Наҳот менга қўшилиб яна бир инсоннинг жиҳозларнинг ҳақиқий эгасининг ҳуқуқлари ҳам поймол қилиниши керак? Қонунларимиз кимларга хизмат қиляпти ўзи? Халққами ва ё мансабдорларнинг манфаатларигами?

Оиламнинг 3 нафар аъзоси бир ой давомида 200 минг сўм билан оч қолмай тирикчилик ўтказиши мумкинми? 1кг оддий уннинг нархи 2000 минг сўмга чиқиб, нонвойхоналарда нон 2тадан ортиқ сотилмай қўйилган бир пайтда.

Қачонгача миллатимиз вакиллари чет элларга бориб мардикорлик қилиб кун кечириши керак? Миллат шаъни ва қадр-қиммати ҳақида ким ўйлаб ким қайғуради? Ё фақат мансабдорлар ўз чўнтагию, нафсини яъни ошхонама ошхона, тўйма-тўй кайфу сафо қилиб юришлари ҳақида қайғуришадими? Чунки уларнинг бундан ортиқ ташвиши қолмаган охирги йилларда!

Буни нафақат мен, балки кўпчилик халқ кузатмоқда! Халқ орасида норозилик келтириб чиқараётган мансабдорларни нега ҳукумат жазоламайди? Қачондир адолатсизликлардан тўйган халқ портламасмикан?

Дилдора Боймуродова

19-август, 2015-йил.