УРЛАЕВА БУГУН ҲАМ МИЛИЦИЯ КАЛТАКЛАРИ ОСТИДА ҚОЛДИ

2015 йилнинг 16 август куни “Буюк ипак йўли” метросида Малоҳат Эшонқуловани ҳолидан хабар олишга монелик қилган милиция ходимлари “Альянс” инсон ҳуқуқлари ташкилоти лидери Елена Урлаевани уриб, тан жароҳати етказиб, оёғини синдириш даражасига бориб етган ва беморга тиббий ёрдам кўрсатиш ўрнига милиция ходими томонидан чақиртирилган наряд ёрдамида Урлаева Мирзо Улуғбек ИИБси кеч соат 16.30 ларга қадар кун бўйи оч ҳолатда хибс этилган эди.

Айни дамда травматология томонидан оёғи гипс қилинган Урлаевани милиция ходимларининг ур-сурлари ҳам чўчита олмади.

Бугун, 2015 йилнинг 18 август куни “Альянс” инсон ҳуқуқлари ташкилоти етакчиси “Эшонқуловани тиббиёт даволасин” деган талаб билан яна президент резиденцияси олдига талабнома билан пикетга чиқди.

Бироқ, инсон ҳуқуқлари лидерининг ушбу галдаги пикети ҳам муваффақиятсизликка учради. Елена Михайловна бу гал бир эмас бир нечта милиция ходимлари томонидан аёвсиз калтакланди.

– Оёғингиз 16 август куни милиция калтагидан кучли зарб еган, гипсдасиз. Бир оёқда Эшонқулованинг саломатлигидан куйиниб яна пикетга чиқишингиз шунчалар зарурмиди? Ўз саломатлигингиз ҳақида ҳам қайғурмайсизми? Маълумки, 15 август куни ҳам “Эшонқуловани давлат шифохоналари даволасин” деган талабнома билан пикет ўтказиб, ИИБнинг асирига айлангандингиз. Кун бўйи оч-наҳор ИИБ идорасида тутқунликда тутиб туришганди. Бир шахс тақдирига куйиниб икки бор пикет ўтказиш шунчалар шартмиди? – ажабланиб сўраймиз Урлаевадан.

– Мен 14 август куни Эшонқуловани кўргани уйига бордим. Унинг аҳволини бир кўрсангиз эди. Юрса чарчаб, икки қадам босиб ўтириб қолади, кўмаксиз юра олмайди. Ўта озиб кетган. Сочлари сомон бўлиб тўкилиб кетган. 10 кундирки ўнг қўли ҳам ишдан чиқибди. Оғриқ энди чап қўлигаям ўтибди. У қонсиз, ҳолсиз. Чала ўликдек чўзилиб ётибди. Гемоглабини 59 экан. Оёқлари чўкиртак…. Эшонқулова 90 ёшли кампирчаларга айланиб қолибди. Унга зудлик билан тиббий ёрдам кўрсатилмаса бўлмайди. Инсон ҳуқуқлари соҳасида, журналистлар орасида жамиятнинг камчиликларини очиб ташлашга қодирлари саноқли, деярли йўқ. Эшонқулова биринчилардан бўлиб тузумнинг башарасини очиб ташлашга журъат этган журналистлардан.

Агарда унинг тақдири аянчли якун топса, ҳаёти аросатда қолиб кетса, унга маслакдошлари инсонпарварлик қўлини чўзмаса, кейин бошқа ҳамкасблари чўчиб қолишади, “Адолат излаган одамнинг тақдири мана шундай аянчли якун топса?…” деб ҳеч ким унинг, бизнинг ортимиздан эргашмайди, ишонмайди. Шунинг учун ҳам биз биттагина мустақил журналистимизни йўқотиб қўймаслигимиз керак. Рақибларимиз етарли, биз бир-биримизни асрашни билишимиз керак. Чунки шусизам сафимиз жуда сийрак. Дўст шундай кунларда билинади” дейди Урлаева.

Пикетга чиққач милиция ходимлари томонидан ўласи қилиб калтакланган инсон ҳуқуқлари лидери Е. Урлаеванинг тақдири ҳозирча номаълум. Телефон алоқаси ўчирилган.

“Альянс” инсон ҳуқуқлари ташкилоти Матбуот хизмати

18- август, 2015- йил.