Қурилтой қарорига кўра ЎИҲЖга Ўзбекистонлик мустақил журналист ва ҳуқуқбон Малоҳат Эшонқулова президент этиб сайланди

Б И Л Д И Р И Ш

ЎЗБЕКИСТОН ПОЙТАХТИ ТОШКЕНТДА ЎЗБЕКИСТОН ИНСОН ҲУҚУҚЛАРИ ЖАМИЯТИНИНГ НАВБАТДАГИ ҚУРИЛТОЙИ БЎЛИБ ЎТДИ

2017 йилнинг 12 сентябрь куни Тошкент шаҳрида Ўзбекистон Инсон ҳуқуқлари жамиятининг навбатдаги 8-қурилтойи бўлиб ўтди.

Қурилтойда ЎИҲЖ аъзоси Малоҳат Эшонқулова, Ирландиядан Абдужалил Бойматов ИМО орқали, Рифат Усиенов, Карима Бекмирзаева, Галима Фёдровна, Муҳаммадқодир Бўронов, шунингдек, кузатувчи сифатида Ўзбекистон Альянси инсон ҳуқуқларини ҳимоя қилиш ташкилоти етакчиси Елена Урлаевалар иштирок этишди.

Қурилтой очиқ деб эълон қилингач, ЎИҲЖини 2009- йилнинг 6-майидан 2017- йилнинг 6-майигача бошқарган Абдужалил Бойматов сўз олди.

Абдужалил Бойматов ўз нутқини ЎИҲЖтининг қисқа тарихи ҳақидаги кириш сўзи билан бошлади:

Менга сўз берганлиги учун Малоҳат Эшонқуловага ва қурилтой қатнашчиларига ўз миннатдорлигимни билдираман. Мен ўз сўзимда 3 нуқтага сизларнинг эътиборингизни қаратмокчиман:

Биринчиси, ЎИҲЖида президент 2 йилга сайланади ва энг кўпи билан 4 марта сайланиши мумкин, яъни президентлик муддати 8 йил билан чегараланган. Жамиятга янги раҳбар келса, у янги ғоялар билан келади ва 8 йил бу ғояларни амалга ошириш учун етарли бўлади. Жамиятда раҳбарларнинг алмашиб туриши жамиятда турғунлик ва инқирозларнинг олдини олиб жамиятнинг унумли, самарали ишлаб ривожланишига олиб келади деб ўйлайман.

Иккинчиси, ЎИҲЖи 1992-йилнинг 2-февралида ташкилотимизнинг 1-раиси Абдуманноп Пўлатов ва бошқа фаоллар томонидан ташкил этилган. Абдуманноп Пўлатов жамиятимизни 1992-2001, Толиб Ёқубов 2001-2009, камина 2009-2017 йилларда бошқардик. Таъқиб ва тайзиқлар туфайли Абдуманноп Пўлатов Ўзбекистонни 1996 йили, Толиб Ёқубов ва камина Абдужалил Бойматов 2006 йили тарк этишга мажбур бўлдик. Абдуманноп Пўлатов 2010 йилнинг ноябрь ойида АҚШда вафот этди. Ҳозирда Толиб Ёқубов Францияда, камина Ирландияда фаолият олиб борябмиз.

Учинчиси, ЎИҲЖи ташкил топган кунидан шу пайтгача доимий равишда Ўзбекистон хокимияти томонидан таъқиб ва тайзиқларга учраб келмоқда. ЎИҲЖ томонидан 6 марта Адлия вазирлигига рўйҳатга олишни сўраб мурожаат қилинган, лекин рўйҳатга олинмади. Толиб Ёқубовнинг сайъи ҳаракатлари билан чет элда, Ўзбекистонда эмас, Францияда 2008 йили тезда рўйҳатга олинди. ЎИҲЖининг Қашқадарё вилояти бўлими раиси Шовриқ Рўзимуродов 2001 йили ИИВ ертўласида ваҳшийларча қийноқлар билан ўлдирилди. ЎИҲЖининг Қашқадарё вилояти бўлими аъзоси Саидмурод Қўчқоров унинг турмуш ўртоғининг айтиши бўйича заҳарлаб ўлдирилган. 31 аъзомиз сохта айблар билан қамалди, 3 аъзомиз руҳий касалхонага зўравонларча жойлаштирилди, 19 аъзомиз ватанни тарк этишди.

ЎИҲЖининг 7 фаол аъзолари: Аъзам Фармонов, Ғайбулло Жалилов, Чўян Маматқулов, Меҳринисо Ҳамдамова, Зулхумор Ҳамдамова, Йўлдош Расулов, Зафар Раҳимовлар ҳануз қамоқда.

Диктатор Ислом Каримов (2016 йил вафот этди) режими томонидан доимий 24 йил давомида таъқиб, тайзиқларга қарамасдан ЎИҲЖ ҳануз фаолият кўрсатмоқда.

Шавкат Мирзиёевнинг эркин, демократик бўлмаган сайловларда Ўзбекистон президенти бўлиб сайланиши кўпчилик ватандошларда Ўзбекистонда инсон ҳуқуқлари вазиятининг яхшиланишига умид уйғотди.

Яъна, шуни қўшимча қилиб таъкидлаб ўтмоқчиманки, бугунги бўлиб ўтаётган 8-қурилтойдан олдинги 1,2,3,4- қурилтойлар Ўзбекистонда, 5-қурилтой Франциянинг Анжерс (Angers) шаҳрида, 6,7 қурилтойлар интернет орқали Ирландия, Франция, Ўзбекистонда ўтказилган эди.

Шу йилнинг, яъни 2017-йилнинг 6-майида менинг ваколатим тугаганлиги сабабли мен ўз лавозимимни топшриш тўғрисида баёнот бердим.

Бугунги кунда ЎИҲЖ раҳбарсиз қолмаслиги керак. Мен бугунги Қурилтойимиз кун тартибига қўйилган энг асосий масала, ЎИҲЖига президент сайлаш масаласига тўхталарканман, Жамиятимиз Ўзбекистонга қайтишини ҳоҳлайман. Шу сабабдан мен Жамиятимиз Президентлигига мустақил журналист ва Жамиятимиз аъзоси, ҳуқуқбон Малоҳат Эшонқулова номзодини тавсия қиламан.

Эшонқулованинг фаолиятини анчадан буён кузатиб бораман. Малохат Эшонкулова кўп йиллик журналистлик, ҳуқуқбонлик, раҳбарлик тажрибасига эга жасур инсон. Менимча у Жамият президентлигига энг муносиб номзод, – деди А. Бойматов.

Шундан сўнг сўзга чиққан Қурилтой аъзолари Бойматовнинг таклифини қўллаб қувватладилар:

Жумладан Карима Бекмирзаевна шундай деди:

Қурилтой иштирокчилари Эшонқулова хусусида ижобий фирклар билдиришди:

Ўз навбатида, Қурилтойда кузатувчи сифатида иштирок этаётган Ўзбекистон Альянси инсон ҳуқуқларини ҳимоя қилиш ташкилоти раҳбари Елена Урлаева Малоҳат Эшонқулованинг номзоди энг тўғри танлов эканлигига тўхталди.

Шундан сўнг ЎИҲЖ президентлигига номзоди кўрсатилаётган Малоҳат Эшонқулованинг номзоди овозга қўйилди.

Қурилтой иштирокчилари бир овоздан М. Эшонқулованинг номзодини тасдиқлашди.

Шунингдек Қурилтой иштирокчилари кун тартибидаги 2- масала – ЎИҲЖ нинг Вице–президентлигига номзодни танлаш ва маъқуллаш масаласини муҳокама қилдилар.

ЎИҲЖнинг Вице–президентлигига Ирландияда истиқомат қилувчи ҳуқуқбон юртдошимиз Абдужалил Бойматовнинг номзоди кўрсатилди.

Йиғилганлар бир овоздан А. Бойматовнинг номзодини Вице-президентликка маъқуллашди.

Кун тартибига қўйилган масалалар муҳокамасидан сўнг ЎИҲЖ ўзининг навбатдаги Қурилтойига якун ясади.

Қурилтой қарорига кўра ЎИҲЖга Ўзбекистонлик мустақил журналист ва ҳуқуқбон Малоҳат Эшонқулова президент этиб сайланди. ЎИҲЖ Вице–президентлигига Абдужалил Бойматовнинг номзоди бир овоздан маъқулланди.

Тошкент, Ўзбекистон.

12 сентябрь, 2017 йил.

ЎИҲЖ матбуот хизмати.