ЕЛЕНА УРЛАЕВА БУГУН ҲАМ ИИБда ТУТҚИН ҚИЛИНДИ

 асосий эркинликлар, Инсон Ҳуқуқлари, хабарлар, ҳуқуқбон  Add comments
Aug 162015
 

Куни кеча мустақил журналист Малоҳат Эшонқулованинг саломатлиги масаласида Президент резиденциясида пикет ўтказган Елена Урлаева ҳар доимгидек Мирзо Улуғбек туман ИИБ Терроризимга қарши кураш бўлими ходимлари томонидан банди этилган ва то 19.30 ларга қадар – кун бўйи тутқинликда ушлаб турилган.

Бугун, 16 август куни эрталаб Елена Урлаева Эшонқуловадан хабар олиш мақсадида уйидан чиқмоқчи бўлганида уйи атрофида махсус хизмат ходимлари ўраб олишганлигига гувоҳ бўлган.

Терроризимга қарши кўраш бўлими ходимлари: “Эшонқуловани кўришга бормайсиз, унинг саломатлигини тиклашга кўмак бермайсиз, уйингиздан чиқмайсиз. Агарда чиқсангиз яна кун бўйи Мирзо Улуғбек ИИБсида ўтиришингизга тўғри келади, сизни олиб кетамиз” деб Урлаевани уйидан чиқишига монеълик кўрсатишган.

“Эшонқулова ўлим тўшагида. Агар у ўлиб қолса, ҳаммангиз жавоб берасиз. Мен уни шифохонага жойлаштириш учун боришим керак”- деганча Елена Михайловна Эшонқуловага руҳий мадад бериш мақсадида уйидан чиққан.

– Буюк Ипак йўли метросига тушиш жойига келганимда милиция ходими менга провокация уюштира бошлади. Фотоаппаратимни тортиб олиб қўйди. Наряд чақиртирди. Ҳозир метрога тушиш жойида ушлаб туришибди, – дейди Урлаева.

Орадан кўп ўтмай Милиция ходимлари Елена Урлаевани метро бекатидан мажбурий тарзда Мирзо Улуғбек ИИБ сига олиб боришди.

“Айни дамда мен яна милицияда тутқинликдаман. Ўзбекистонда фуқаро истаган одами билан кўришиши, истаган жойига бориб-келиши таъқиқланганлигини билмаган эканман. Эшонқуловани саломатлигидан хабар олмаслигим учун бутун бир давлат милицияси мени тутқунликда ушлаб туришибди. Бир журналист аёлнинг саломатлигини тиклашга ёрдам бериш учун уни йўқлагани боришим нимани ўзгартиради, давлатга қандай зиён етказади, ҳайронман?” дейди Урлаева.

“Альянс” инсон ҳуқуқларини ҳимоя қилиш ташкилоти етакчиси Елена Урлаева бугун ҳам то тунга қадар Мирзо Улуғбек туман Ички ишлар ходимлари томонидан асирликда олиб ўтирилиш эҳтимоли бор.

Ўзбекистонда инсон ҳуқуқларини паймол қилиш, фуқароларнинг эркин ҳаракатларини таъқиқлаш иллатлари давом этмоқда.

“Альянс” инсон ҳуқуқларини ҳимоя қилиш ташкилоти матбуот хизмати.

16-август, 2015-йил.