ПУТИН СИЁСАТИНИ ЎЗБЕК МУХОЛИФАТИ ВАКИЛИНИНГ ҚЎЛЛАШИ – БИЗНИНГ ФАЛОКАТИМИЗДИР!

“Озодлик” радиоси орқали яқинда берилган Украина ва Россия сиёсатига бағишланган эшиттиришни тинглаб, тушимми ўнгимми, билмай қолдим. Муҳаммад Солиҳга қарашли укамиз ҳолис фикрларни билдирди, лекин, мен ўзимга ғоявий томондан сафдошим деб юрган укам Тўлқин Қораев ва мен умуман танимайдиган Меҳрибон исмли бир аёлнинг Путин сиёсатини қўллаши шахсан мени карахт аҳволга солиб қўйди.
Ўзбекистонда яшайдиган аёлни-ку тушинса бўлади. У ҳақиқий ўзбек экан, лекин, Тўлқинга нима бўлди? У ҳамма нарсани тушинади-ку! Уни айтишича минглаб сиёсий маҳбуслар ҳозир турмаларда ётибди экан ва биз Россияга қўшилсак уларни ўрис чиқариб юборар эмиш. Юз эллик йилдан бери миллионлаб ҳақиқатгўй милллатдошларимизни, атиги ақллли бўлганликларги учунгина қатл этган Россия бизларга раҳм қилиб турмада ётган дўстларимизни чиқариб юборадими? “Сенлармидинг, мустақиллик учун курашган!”-деб қолган-қутганларимизни ҳам тиқади-ку! Бизларга Америка душман эмишу, Кремлъ дўст эмиш. Эй Ҳудойим-ей, буларга нима бўлаяпди ўзи?
Ўзи ҳар куни Россия телевидениелари орқали Путин тарғиботини кўравериб жонимизга тегиб кетган бир пайтда мухолифатчиман деб юрганлардан ҳам шундай гапни эшитиш даҳшат бўлиб туюлди менга.
Хокимият тепасига Путин келгач, Чеченистонни қонга булғади. У ерда Ватанининг мустақиллиги учун курашаётган Жавҳар Дўдаев раҳбарлигидаги кучларни миллатчи, террорчилар деб атади. Ҳозирда Данецк ва Ҳарков томонларда Путин ҳукумати даъвати билан давлатни бўлиб ташлашга ҳаракат қилаётган ўрисларни Украина ҳукумати террорчилар деса Путинни аллақаерлари қичияпди. Шундай мутаххамлар сиз билан бизларни ҳимоя қиладими? Аждодларимизни қириб ташлаб, бизларни ҳалигача қутила олмаётганимиз, сациализм деган бало ғояга гирифтор қилганлардан нажот кутиш қайси мантиққа тўғри келади?
Ҳой дўстларим ўзи биз кимдан мустақил бўлган эдик? (ҳар ҳолда халқимиз тўла мустақил бўлмаган бўлса ҳам). Ҳозирку Ўзбек ҳукумати халқаро жамоатчилик олдида бизларга ўхшаган беш-ўнта мухолифатчиларни Ўзбекистонда ушлаб турибди, агар бизнинг тўла жиловимиз яна ўриснинг қўлига ўтса, бизларга ўхшаганларни ҳам қамоққа тиқилишини тушиниб етмадингизми ҳозиргача? Путинни,чор Россиясининг ва Лениннинг, Сталиннинг сиёсатини давом эттираётганини наҳотки ҳали ҳам тўла англаб етмаган бўлсангиз? Агар тушиниб етмаган бўлсангиз нима учун мухолифатчиман деб юрибсиз? Биз мустақиллик учун курашганимизда қайси сиёсатга қарши курашганмиз ўзи? Бугун қайси сиёсатга қарши курашаяпмиз.Биз курашаётган сиёсатнинг замирида Кремлъ сиёсати турибди-ку! Бунчалар қулликни яхши кўрмаса булар! Ўзбкистонда мана шундай фикрда бўлган сиёсий саводсиз кишилар борлиги учун ҳам, олдинга силжишимиз қийин кечаяпди.
Тўлқиннинг ва Тошкентлик синглимизнинг чиқишларини ҳудди Украинадаги Путин тарғиботига учиб, (эхтимол унинг пулига учиб) Рус ОАВларида чиқиш қилаётган Украиналик ўрисларнинг фикрларига ўхшатиб юбордим.
Русияни қўллаётган эй биродарлар!Шунчалик руспараст экансиз, у ёқларда нима қилиб юрибсиз? Россияга келиб Путиннинг қучоғида яшавермайсизларми?

 
Носир Зокир
 Ўзбекистон Инсон Ҳуқуқлари Жамиятининг Фарғона водийси бўйича мувофиқлаштирувчиси
3-май , 2014-йил.