Ажалимдан беш кун бурун ўлдириш гали менга келди…ми?

“Бирдамлик” Ҳалқ Демократик Ҳаракати Қурилтойини АҚШда ўтказиш режалаштирилгандан буён ҳукуматдагиларнинг ҳаловати бузилган, еган-ичганлари ичларига тушмаяпти чамаси.

Акс ҳолда куч ишлатар тизимлар мамлакат ичкарисидаги “Бирдамлик”чиларни “соя”сига айланмаган бўлишарди, дейман-да.

Қурилтой режалаштирилиши билан АҚШга бориш мақсадида ҳужжатларни расмийлаштиришга тараддуд кўра бошладим.

“Бирдамлик”нинг Ўзбекистон бўлими етакчиси сифатида Қурилтойда иштирок этишим шартлигини билардим.

Ҳорижга чиқиш учун Ички ишлар тизимининг Ҳорижга чиқиш, кириш, фуқароликни расмийлаштириш бошқармасидан чиқиш визаси (ОВИР) олиш зарурлигини биласиз.

Менда эса айнан ана шу савил – ОВИР йўқ.

2012 йилда қарйиб йил давомида югуриб, Тошкент вилояти Ҳорижга чиқиш, кириш, фуқароликни расмийлаштириш бошқармаси томонидан “отказ” олганман.

ОВИР ходимларини айтишларича, “назоратда турган фуқаро” эмишман. Шу сабаб менга “ОВИР бериш мумкинмас”миш.

Ўша кўнгилсиз югур-югурлардан кейин, қўлимни ювиб, қўлтиғимга суриб қўя қолгандим.

АҚШда ўтиши режалаштирилган Қурилтой баҳона яна Тошкент вилояти Ҳорижга чиқиш, кириш, фуқароликни расмийлаштириш бошқармасига бош уриб боришимга тўғри келди.

Буни қарангки, Ҳорижга чиқиш, кириш, фуқароликни расмийлаштириш тизимида “оламшумул” янгилик:

Нима эмиш: ОВИР деган савил БИОМЕТРИК паспорт олмаган фуқароларга берилмасмиш.

Биометрик паспорти йўқ одамлар ҳорижга чиқиш визасидан маҳрум этиларкан.

АҚШга бораман, Ҳаракат Қурилтойида қатнашаман деган хомхаёлда ҳорижга чиқиш визаси олиш учун Тошкент вилояти Ҳорижга чиқиш, кириш, фуқароликни расмийлаштириш бошқармасига бориб, бошқарма биносидаги банкга “хизмат ҳақи” билан қўшиб нақд 50 минг сўмни тўлаб, тўлов қоғозини ҳам элдан бурун оливолганман.

Қани энди ОВИРдагилар ҳужжатларимни қабул қила қолишса-чи?!

“Йўқ, биометрик паспортингиз йўқ экан. Янги паспортингиз бўлмаса, қонунга мувофиқ сизга ОВИР бериш мумкин эмас. Аввал паспортингизни алмаштириб келинг” деб оёқ тираб туриб олишган денг.

Тақдирга тан бериб, беш дақиқа олдин пулини тўлаб қўйган банк филиалидан тўлов маблағимни қайтариб оламан десам, аксига олиб, банк шаҳобчасидаги қизалоқ “Биз “инкассо” топшириб бўлдик. Тўловларни ҳаммасини аллақачон инкассатор йиғиштириб кетди. Сизнинг пулингизни чўнтагимдан қайтараманми? Энди маблағингиз қайтарилмайди” деб кўзини лўқ қилиб туришдан нарига ўтмайди.

“Мол аччиғи – жон аччиғи”-да! “Емаган сомсага пул тўлаш” кимга ҳам ёқарди.

“Қўлим билан бериб, оёғим билан югураман”ми энди?” деган аламли ўйда жаҳл устида Ички ишлар вазирлигининг “Ишонч телефони”га қўнғироқ қилдим.

У ердаги ходимлар Республика Ҳорижга чиқиш, кириш, фуқароликни расмийлаштириш бошқармасининг “ишонч телефони”га сим қоқишим зарурлиги хусусида тушунтириш беришди.

Республика Ҳорижга чиқиш, кириш, фуқароликни расмийлаштириш бошқармасининг “ишонч телефони” билан боғландим.

Навбатчи гўшакни кўтариши билан дийдиёмни бошлаб қолувдим, “ишонч телефони”да ўтирган ходим  “ҳужжатларни қабул қилаётган ходимга телефон гўшагини беринг” деб қолди.

Тошкент влиоят ОВИРидагилар хизмат пайтида “тепадан” бўлган қўнғироққа ҳам жавоб беришмаскан. “Тошингни тер” деб юборди.

Шунда “ишонч телефони”даги овоз “Ҳозир, ўзимиз айтамиз, ҳужжатларингизни қабул қилишади, сиз хавотир олманг” деб қувонтириб қолди.

Умид билан бир юз биринчи бўлиб навбатда турдим. Йўқ, ҳартугул, “ишонч телефони”дагилар беҳудага пашша қўриб ўтирмасликларини амалда исботлаб қўйишди.

Ҳалигина “Биометрик паспортингиз бўлмаса, ҳужжатларингизни қабул қилмайман” дея тихирлик қилиб ўтирган ходим, лом-мим демасдан ҳужжатларимни қабул қилиб олди, лекин….

Мана, қарйиб бир ойдирки ана шу “лекин” деганлари мени юрак-бағримни кабоб қилиб югуртириб ётибди-да.

Тошкент вилояти Ҳорижга чиқиш, кириш, фуқароликни расмийлаштириш бошқармасидагилар  ҳужжатларимни “паспортсиз топшираяпман. 20 кун ичида биометрик паспорт олиб келаман” деган ариза ёзиш шарти билан олиб қолиб, паспортимни қўлимга тутқазишди.

Менгина “Доимий рўйхатда турадиган манзилим – Зангиота туман паспорт столига бораману, амалдаги паспортимни бериб, ҳаш-паш дегунча биометрик паспортга алиштириб оламан” деган хаёлда хомтама бўлган эканман.

Менинг каби “поездга осилиб келган областной”ларнинг биометрик паспорт олиши ўлимдан ҳам қийин экан.

Зангиота туман паспорт столига учрашгандим, у ердагилар биометрик паспорт олишим учун адоғи кўринмайдиган ҳужжатлар рўйхатини қўлимга тутқазишди: “Мана шуларни келтиринг!” дейишди.

Энг аввало, доимий рўйхатда турган уй эгасининг Зангиота туман ИИБ бошлиғи номига  “Эшонқулованинг доимий рўйхатда бундан кейин ҳам туришига розиман” деган аризасини нотариус орқали тасдиқлатиб “домовой”нинг асли билан келтиришим “ниҳоятда зарур” экан.

Хабарингиз борми-йўқми, билмадиму, менинг мамлакат ичкарисидаги ҳаракатланишимни чеклаш мақсадида 2010 йилда  куч ишлатар тизимлари ходимлари мен доимий рўйхатда турадиган уй эгасининг ўтакасини ёришган, мени доимий рўйхатдан чиқириб юбориш мақсадида уй эгасини фуқаролик судига мурожаат қилишга мажбур этишган.

Аввал ҳам бу ҳақда ёзгандим: мен ушбу манзилда 1989 йилдан букён доимий рўйхатда тураман.

Бундан 30 йиллар олдин одамларда оқибат бўларди.

Поччамамнинг қуролдош дўсти сифатида уй эгаси мени ҳеч бир таъмасиз, порасиз, шундоқ, савоб учун доимий рўйхатга қўйиб қўйганди.

Шунинг ўзигина бўлса – кошки эди.  Мен талабалик йилларимда бу хонадонда то турмушга чиққинумга қадар ижара ҳақи тўламасдан 4 йил истиқомат қилганман. Гувоҳларим бор. Турмушга чиққанимдан кейин ҳам оилам билан биринчи фарзандим дунёга келгунга қадар яшаганман. Шу боисми, бу хонадон эгалари билан ота-бола бўлиб, қадирдонлашиб кетгандик. Ўша йиллар ёдининг ҳурматими, билмадим, уй эгалари паспортимнинг доимий рўйхатидан “воз кечиб юборишга” истеъҳола қилишади, назаримда….

Ўзим ҳам уй эгаларига оғирлигим тушишини, зиёним тегишини ҳечам истамаган бўлардим. Уларнинг яхшилигини суиистеъмол қилмасам дегандим. Бир пайтлар Тошкент шаҳрига доимий рўйхатдан ўтсам деб кўп ва хў-ўўўп югургандим ҳам. Аммо…

Тошкент шаҳрида доимий рўйхатим йўқлиги боис, харид қилган уйим ҳали ҳамон  яқин қариндошимнинг номида қолиб кетди. Ўша пайтларда Тошкент шаҳрига доимий рўйхатдан ўтиш илинжида Тошкент шаҳар ҳокимиятига ҳужжатларни тақдим этиб, рад жавоби ҳам олганман.

Очиғини айтганда, “олди-берди” бериш “удуми”ни  амалга оширишга бўйним ёр бермаган.

Худди ана шу “нуқсон”им мени мана қарйиб 30 йилдирки Зангиота туманига занжирбанд қилиб  қўйди.

Эй-ййй, нимасини айтасиз?!: Ўз ватанимда “ўгай бола”дек яшайман.

Ватангадоларнинг кўкси ўксимаса ҳам бўлади.

Мана, биз, ҳатто ўз киндик қонимиз тўкилган заминда бегонадекмиз, ИИБчиларнинг “Қув! Қоч!”ларидан қўрқиб, юраклар безиб, эшик тирқишидан мўралаб умргузорлик қиламиз.

Икки куннинг бирида “доимий прописка” сўраб, эшик қоқиб келишади.

Ўз пулингга харид қилган ўз уйингда “квартирант”дек, омонат одамдек, айбдор бандадек, “Бир чўқиб, ўн қараб”, тузоқ қўйилган кабутардек қўрқиб яшайсан киши!  Жонларга тегиб кетди, пичоқ келиб бўғизга етди-ку!

Ҳар куни битта нағма чиқариб ўтиради бу Ҳукуматдагилар!

Бемаза қовуннинг уруғи кўп бўлади деганларидек, бу адолатсиз ҳукуматнинг нимаси кўп – қонун-у қарори кўп! Сону бору сабоғи йўқ. Бир-бирини инкор қилувчи қонун-у қарорлар кишини эзиб, эсанкиратиб ташлайди.

Нега денг?

Негаки, 45 ёшга тўлишим муносабати билан паспортимни алиштирганимга кўп бўлган эмас.

Ўшанда ҳам мен “келгинди”дан минг битта ҳужжат сўрашганди.

Яқингинада ҳам уй эгасининг Зангиота туман ИИБ бошлиғи номига ёзилган розилик аризасини нотариус орқали тасдиқлатиб тақдим этгандим.

Бу гал ҳам шундай қиламиз, амакимдан бир энлик розилик аризасини ноттариус орқали тасдиқлатиб, паспорт бўлимига топширамиз, деган илинжда уй эгасини олиб туман нотариус идорасига келсам,  муродим ҳосил бўлмоқ қайда дейсиз!

Энди давлат нотариусидагилар ҳам фуқароларни саргардон этиб сарғайтиришнинг минг битта усулини ўйлаб топишибди.

“Уй эгаси қани?” – “Мана!”, “Паспортичи?” – “Ана!”, Уй ҳужжатларичи?” – “Домовой”ини кўздан кечиришингиз мумкин”, “Уй-жой қуриш учун берилган ҳокимият қарори-чи?” –  “Мана, бор?”, “Уй-жой куриш учун ер ажратиш тўғрисидаги қарор чиқарилган йиғилиш “проктокол”и ҳам жойидами?” – “Жойида, кўришингиз мумкин”….

Шу каби савол-жавоблардан кейин нотариус идораси ходими “бўлмайди” дегандек бош чайқаб, бурнини жийирди.

“Нега бўлмайди?”

“Бу “домовой” асосида уй эгаси Сиз учун доимий рўйхатда туришингизга рухсат бериш мақсадида ИИБ бошлиғига ариза бера олмайди. Бу аризани нотариус тасдиқламайди ҳам. Негаки, бу ҳовли жойга ҳалигача туман “БТИ” сидан кадастр қилинмаган. Боринглар, “БТИ”га мурожаат қилинглар, аввал, уй жойни кадастр қилдириб, эгалик ҳуқуқини тиклаб келинглар. Кейин уй эгаси ариза ёзиш ҳуқуқига эга бўлади, ўшандан кейингина биз тасдиқлаб беришимиз мумкин” деса бўладими?!

“Барака топгур,  нотариус орқали саҳал иллайроқ тасдиқланган уй эгасининг ИИБ бошлиғи  номига ёзган мана бу аризаси нусхасига боқинг. Мана шу аризаларини ҳам сизлар мана шу “домовой”га асосланган ҳолда  тасдиқлаб бергандинглар. Нега ўшанда кадастр қилинглар деб тихирлик қилмагансиз?” ажабландим.

Нотариус томонидан тасдиқланган уй эгасининг аризаси нусхасини олган ходим унга узоқ тикилиб турди-да, “Бу ариза бизда тасдиқланмаган. Бу ариза биринчи қаватдаги нотариус томонидан тасдиқланган. Биз иккинчи қаватда ўтирамиз. Сиз бу нотариусда тасдиқланган ариза нусхасини биринчи қаватдаги нотарусга олиб боринг” деди бепарво.

“Биринчи қаватдаги нотарус ҳам давлат нотариусими? Ё ҳорижникими? Ўзбекистондаги барча нотариусларга Ўзбекистонда битта қонун жорий этилганми? Ё “Биринчи қаватдаги нотарус қонуннинг “А” банди асосида, иккинчи қаватдагилар қонуннинг “Б”, “В” бандлари асосида фаолият олиб борсинлар” деб ҳар бир нотариус ходимларига алоҳида-алоҳида қонун ҳужжатлари ишлаб чиқилганми? Тушунтириб беринг, илтимос” дедим бетоқат бўлиб.

“Опа, ҳар куни битта қонун чиқади. Кечаги гап бугунга тўғри келмайди. Ҳозир бу тартибга ўзгартириш киритилган. Токи туман “БТИ”сидан кадастр қилинмас экан, барибир уй эгасининг аризасини тасдиқлаб бера олмаймиз. Ишонмасангиз, биринчи қаватдаги нотарусдан ҳам суриштириб боқишингиз мумкин” хушмуомилалик билан жавоб қилди нотариус ходими.

Унинг маслаҳатига амал қилиб, уй эгаси билан биринчи қаватга етаклашиб тушдик.

“Тепа”дагилар – “иккинчи қават”дагилар ҳақ экан, пастда ҳам айнан ана шу “қоида”ни уқтиришди….

Ноилож, уй эгаси билан Зангиота туман Кадастр бўлимини қидириб кетдик….

Аксига олиб туман Кадастр бўлимидагиларга мурожаат қилиш учун ҳам қарйиб 10 га яқин ҳужжат илова қилиниши керак экан…

Қишлоқчиликни биласиз.

Уй эгасига қолса, кадастирсиз ҳам яшайверади. Уйларини шошилмасдан бирор кун бафурсат кадастр қилдиришга бел боғлашлари аниқ.

Бироқ, биометрик паспорт олишимни тезлаштириш мақсадида амакимнинг уйларини кадастр қилиш кўпроқ менга зарурроқ эди…

Мен бу гапларни нима учун айтаяпман?

Хуллас, Қурилтойда иштирок этиш, АҚШга бориш истаги  бошимга яқин ўтмишдаги балоларни қайта бошлаб келди.

Негаки, ҳали айтганимдек, биометрик паспорт олиш илинжида доимий рўйхатда турган хонадонга устма-уст бир-икки қатнашга мажбур бўлгандим.

Қадамимни ҳам қаричлаб юрадиган хуфялардан иккитаси икки кун илгари  доимий рўйхатда турган хонадонимда кутилмаган меҳмон бўлишибди.

Яна ўша гап: “Эшонқулова сизга ким бўлади? Қачон уни доимий рўйхатга қўйгансиз? Нега қўйгансиз? Ниманинг эвазига қўйгансиз? Нима учун бундан кейин ҳам доимий рўйхатда қолдирмоқчисиз? Бу аёл билан сизларни нима боғлаб туради? У “закун”чи хотин бирор бир кун ҳовли-жойингизга кўз олайтиришидан, уй-жойингизни ўзлаштириб олишидан қўрқмайсизми? Эшонқулова сизни қўрқитаяптими, шантаж орқали пропискасини доимий рўйхатда туришига эришаяптими? Сизга босим қилаяптими? Эшонқуловадан шикоятингиз бўлса, биз кўмакка тайёрмиз” дея уй эгасини саволга тутган куч ишлатар тизими ходимлари кекса амакимнинг оғримаган бошларини роса оғритишибди.

Бу “қиссача”га қулоқ тутарканман, бутун вужудим алам алангаси ичида қолди. Асабдан ёниб, дутаб кетдим.

Мен кимман ўзи?

Амалдаги ҳукумат учун шунчалар хафли фуқароманми?

30 йилдан бери ўз ватанида ватангадо этилган, уй уйига доимий рўйхатдан ўта олмасдан, ўзгалар эшигида доимий рўйхат дея бош эгишга маҳкум этилган бир бечораман-ку!

Мен кимман?!

Тошкентда ўз уйи бўла туриб, болаларини доимий рўйхатдан ўтказа олмаган, натижада оиласи узилган дур шодасидек Ўзбекистон бўйлаб сочилиб кетган бандаман – жабирдийдаман-ку!

Ўзим Тошкент вилоятининг Зангиота туманида, кимнингдир уйида “сиғиндиман”.

Қизалоқларим Самарқанднинг Самарқанд туманига”сочилиб” кетган.

Гапнинг пўст калласина айтганда, Ўзбекистонда урф бўлган “олди-берди”нинг каштасини келтира олмаганим учун ҳам ўз ватанида ранги самон бўлган сағирман-ку.

Нима, Ўзбекистонда жабирдийдалардан жиноятчи ясаш, таъқиб қилиш “мода” бўлганми?!

Гуё мен хавфли жиноятчидек қадамимни қаришлашлари, соядек эргашишлари, таъқибу тайзиқлари кекирдагимга келиб кетди-ку!

Компюьтеримни “ишғол” этишган, тўлиқ назоратга олишган. Ғинг демайман. Кузатишса, кузатаверишсин, бировдан яширадиган сирим йўқ.

Телефоним туну кун “прослушка”да, тишимни-тишимга қўяман.

Уйимда, юрган йўлимда, ўтирган ўрнимда эшитиш мосламаси бор деган ҳадикда битта-ю битта (!)  бечора турмуш ўртоғимга ҳам кўнглимни очиб бир гап айтишга қўрқиб яшайман.

Нега энди?

Нега энди соямдан ҳам ҳадиксираб яшашим керак?

Қачонгача?

Нима, “Жа-аа, унчалик эмасдир-ов, лоф ураяпсиз” дейсизми?

Ҳа-ааа, ҳатто ўзим ҳам яқин-яқинларга қадар “ортиқча ваҳима қилсам керак” деган хаёлда эдим.

Бироқ…

Куч ишлатар тизимларининг кеча ва бугунги қилғиликлари ҳаммасидан ошиб тушди.

… Ҳали юқорида айтганимдек, биометрик паспорт олиш илинжида доимий рўйхатда турган уй эгасининг уйига – Зангиота туманига икки-уч бор ортиқча борди-келди қилиб қўйдим.

Қачонки, йўлга чиқсам, ортимда “хос соқчиларим” ҳозиру нозир.

Куни кеча сут ранг машинада “ҳамроҳлик” қилишганди.

Истеъҳола ҳам қилишмайди денг. Тўхтасам, тўхтайди, юрсам юради, бурилсам, бурилади…

Одамлар ҳам анойи эмас. Уй эгасининг кўчасига бурилиб тўхтаганимда, орқамдан изма-из келиб, бир неча чақирим нарида кузатувчи бўлиб тош қотган машина ҳатто маҳалладагиларнинг ҳам эътиборини тортган экан.

Ортимиздан келган некция русумли машина секинлашиб, ҳайдовчиси “Ана у жигули кетингиздан изма-из юрибди. Ортингиздан тушганга ўхшайди. Тинчликми? Катта сўмма олиб кетмаяпсизми мабодо?” деса бўладими?

“Йўғ-э, биздақаларда пул нима қилсин? – дея гапни мутойибага  бурдим, – Шунчаки давлат аҳамиятидаги қимматли одамлармиз-да. Шу боис ҳукумат азиз жонимизни арзанда қилиш учун махсус “телохранитель” қўйган”.

Бугун, 20 март куни сут рангли жигули ўрнини эгаллаган “01 Е172 QA” давлат рақамли ҳаво ранг “09”   ортимиздан айғоқчилик қилишга тушди.

Ўнгга бурилсангиз, ўнгга, сўлга қайрилсангиз сўлга қайрилиб, нақд кекирдакка келтирди ўзиям.

“09”дагиларнинг безбетлиги меъдамга тегди. Шу тобда шумлигим тутиб кетди.

Ҳозир бу “хос соқчи”ларимни доғда қолдириб кетаман деган хаёлда тезликни ошириб, қайрилишим керак бўлган бурумдан тўғрига ўтиб кетдим. Қувламачоқ ўйини бошланди.

Юқорида айтганимдек, талабалик йилларимда мен бу маҳаллаларни кўп кезганман.

Ҳарҳолда “эшик-тешиги”ни биламан.

“Телохранитель”ларимни бурчакка “смирно” қилиш учун таниш “тупик” буримлардан бирига қайрилдим.

 

Кичик тор кўча  бориб “тупик”га қадалди. Тўхтадим. Ортга қайрилсам, ҳаво ранг “09”да ўтирган “хуфя”лар ҳам ортимдан шошишган экан.

 

Оқибатда “тупик”га келиб “тиқилиб” қолишди.

 

Феълимга кўра одатда ошкора ҳужумларни хуш кўраман. Бунингдек вазиятда ҳеч нарсани сезмаган ва билмаган кишидек ўзимни гўлликга солиб кетиш менинг феълимга мутлақо ёт нарса.

 

“09” нинг ошкора таъқибини жимгина “ичимга ютиб” кета олмасдим ҳам.

 

Машинани тўхтатиб, шартта тушдим-да, “09” томон юрдим.

 

Бу пайтда, адашмасам, рус ёки татар миллатига мансуб ҳайдовчи машинадан тушиб капот томонига суяниб турар, машинанинг орқа ўриндиғида 30-35 ёшлардаги йигит ўтирарди.

 

Ҳаво ранг “09”нинг олд эшигини шаҳд билан очдим.

 

– Хўў-ўўш, хизмат?, – дедим  орқа ўриндиқда ўтирган йигитга совуқ нигоҳ ташларканман, – Менда бирор бир зарур гапингиз борми? Сизни эшитаман, гапиринг?

 

– Бу нима деганингиз?, – талмовсиради йигитча.

– Кечадан буён ортимдан соядек эргашганингизга қараганда муҳим гапингиз борга ўхшайди, гапиринг, хизмат?

– Адашаяпсиз, мен сизнинг ортингиздан юрган эмасман, мана бу ерга иш билан келдим, – деди йигит тўғри келган томонга боши билан ишора қилиб.

– Қўйсангизчи? Мен ахмоқ эмасман. Тўхтасам, тўхтайсиз, юрсам, юрасиз, бурилсам, буриласиз, қайрилсам қайрилиб, тезлашсам, тезлашасиз, мен кирган маҳалладаги хонадон эшигига қадар кириб борасиз, тинчликми? Буни сезмаслик учун одам овсар бўлиши керак-ку? Кимсиз? Мендан нима истайсиз? Нега мени таъқиб қилаяпсиз? Мақсадингиз нима? Ҳозироқ “02”га қўнғироқ қилиб, отряд чақираман. Шахсингизга аниқлик киритаман. Мен жиноятчи бўлмасам. Террорист ҳам эмасман. Фоҳишалик қилмасам, нега мени таъқиб қиласиз?  Ўз шахсий муаммоларим билан ҳам юришга ҳаққим йўқми? – дедим алам билан.

“Ҳозир “02” га қўнғироқ қиламан деган гапим “телохранитель”имни хушёр торттирди.

 

– Хизматчилик, – деди у ҳижолатомуз, – ўзингиз тушунасиз-у?

– Шунақа денг, хизматчилик бўлса, хизматдаман деб очиғини айтинг-да. Жудаям қон қилдинглар лекин. Одам ўзини жудаям ноқулай сезаяпти. Худди жиноятчидек…  Биласизми, мен ҳамиша кузатувдаман. Доимо ортимдан соядек эргашиб юришади. Лекин ҳали уларнинг бирортаси сиз каби сездириб қўйган эмас. Хизматда бўлсангиз, сездирмасдан, одамнинг юрагига тушмасдан юринг, ҳатто атрофдагилар ҳам англаб қолишибди. Тажрибасизлик ҳам шунчалик бўладими? – деганча, “09”нинг олд эшигини оҳистагина ёпиб, йўлимда давом этдим.

Нўноқ “хос соқчи”м жойидан жилмади. Ана шундан кейин ҳаво рангли “09”га қайтиб кўзим тушмади…

Ўзбекистон ҳукуматига бир савол билан мурожаат этмоқчиман: Нега энди мен “охрана”лар қуршовида истиқомат қилишга маҳкум этилганман?

Бунинг боиси нимада?

“Телохранитель”ларнинг бу каби ошкора тўхтовсиз тақибларини қандай тушунмоқ, не деб шарҳламоқ керак?  Менга нисбатан қўлланилаётган “руҳий хуруж”, “руҳий зарба” дея баҳоласак лоф қилган бўламизми?

 

Доимий рўйхатда турган хонадон эгасини менга қарши “қайраш”дан кўзланган муддао не?

30 йилдирки Тошкент шаҳрига доимий рўйхатдан ўтолмай, ўз уйимда сиғиндидек яшаганим учун мен айбдорманми? Ё ҳукуматми? Ёхуд ҳуқуқларимни чекловчи бир-биридан ўтиб тушадиган қонунларми? Балки буларнинг барига инсон ҳақларини таҳқирловчи қоидалар “кашф” қилган қонун “ижодкор”лари айбдордир?

Зангиота туманидаги танишимнинг уйида салкам 30 йилдирки доимий рўйхатда туришга маҳкум этилган менингдек бир шўрликнинг гуноҳи нимада? Ўз вақтида паспорт столидагиларга пора тиқиштира олмаганимдами? Жамиятнинг “ёзилмаган қонун”ларига бўйсунмаганимдами?

Ҳорижга чиқиш визаси – ОВИР олиш мақсадида Тошкент вилояти Ҳорижга чиқиш, кириш, фуқароликни расмийлаштириш бошқармасига мурожаат этдим.

“Биометрик паспорт олинг” дея амр қилишди.

Ўғирлик, ғарлик қилмадим, жиноятга қўл урмадим.

Бор йўқ “гуноҳ”им биометрик паспорт олишга урунганимми?

Айтингчи, жаноблар, биометрик паспорт олиш истагида доимий рўйхатда турган хонадон эшигига бош уриб борсам, бу – жиноятми?

Доимий рўйхатдан ўтган хонадонга киришим қонунан маън этилганми?

Ўзбекистон фуқароси сифатида биометрик паспорт олиш илинжида зир югуришим гуноҳми?

Биометрлик паспорт олишга ҳаққим йўқми менинг?

Ўзбекистон фуқароси деган номни кўтариб юришимга таъқиқ қўйилмаганми ишқилиб?

Нафас олишим учунчи? Изин берилганми?

Ҳукуматни сўраб турган жаноблар!: Қачонгача асабларимни арраламоқчисиз?

Нима учун?

Мабодо, иродаси заифроқ бирор бир банда бунингдек ошкора таъқибларга дучор бўлганида эди, аллақачонлар юраги уришдан “отказ” қилган бўларди!

Муддаонгиз не ўзи?

Ва ё… Ажалимдан беш кун бурун ўлдириш гали менга етди…ми?

Наҳотки?

Қай бир гуноҳим учун?

Ёзиғим не менинг?

Малоҳат ЭШОНҚУЛОВА

“Бирдамлик” Халқ Демократик Ҳаракати Ўзбекистон бўлими етакчиси

http://birdamlik.info/blog/2014/03/21/ажалимдан-беш-кун-бурун-ўлдириш-гали-м/