ЕЛЕНА УРЛАЕВА БИЛАН УЧРАШУВ

 

 

Хабарингиз бор, бир неча кундирки, «Альянс» инсон ҳуқуқларини ҳимоя қилиш ташкилоти етакчиси Елена Урлаева руҳий касалликлар шифохонасида.

Бугун, 5 март куни “Бирдамлик” Халқ Демократик Ҳаракати Ўзбекистон бўлими етакчиси Малоҳат Эшонқулова, ҳуқуқ фаоллари Шуҳрат Рустамов, Чамангул Негмановалар “Альянс” лидерининг ҳолидан хабар олиш мақсадида у даволанаётган шифохонада бўлишди.

– Даставвал бизни Урлаева билан учраштирмасликка ҳаракат қилишди. Навбатчи ҳамшира “Бизга унинг олдига бегоналарни қўймаслик ҳақида тепадан бўйруқ бор. Беморнинг олдига турмуш ўртоғидан бошқа кишини киритиш маън этилади. Қолаверса, бемор ҳозир маст уйқуда” деб туриб олди, – дейди “Бирдамлик” ХДҲ Ўзбекистон бўлими етакчиси.

– Ҳамширадан рад жавобини олгач, руҳий касалликлар шифохонасининг бош шифокорига учрашишга мажбур бўлдик. Барака топсин, бош шифокор тушунган одам экан, бизга Елена билан учрашишга изин берди, – дейди ҳуқуқ фаоли Шуҳрат Рустамов.

“Биз сизларни беморнинг олдига шунчаки киритиб юбора олмаймиз. Аввал бемордан “Сизни фалончи-пусмодончилар кўргани келишибди. Учрашишни истайсизми?” деб изин сўралади. Елена Михайловна розилик берсагина, эшик олдида бемор билан кўришишларингиз мумкин. Фақат, бироз кутишларингизга тўғри келади. Ҳамширанинг айтишига қараганда, бемор ҳозир уйқуда. Биз йўқлаб келувчилар учун беморни бедор қила олмаймиз” деди бош шифокор ўта хушмуомалалик билан.

– Бироқ, бизнинг узоқ кутишимизга тўғри келмади. Биз бош шифокор ҳузуридан чиқиб, 3- бўлимга келсак, Елена Михайловна аллақачон эшик ёнида турибди. Улар билан панжара ортидан бўлса-да, кўришишга, гаплашишга муваффақ бўлдик, – дейди Чамангул Негманова.

Мухолифат ва ҳуқуқ фаолларининг гувоҳлик беришларича, “Альянс” лидерининг кўриниши ёмон эмас. Бироқ, қиёфасида ҳорғинлик ва сўлғинлик бор. Кучли толиқиш ҳам юз-кўзида шундоққина акс этиб турибди… Урлаева ниҳоятда ҳорғин кўринган.

 Елена Михайловна Ш. Рустамовнинг “Ўзи нима бўлди?” деган саволига “Ҳеч нарсани эслай олмайман” дея жавоб қилган.

“Бу шифохонага қандай келиб қолдингиз?” деган саволга ҳам инсон ҳуқуқлари ташкилоти етакчиси “Ҳеч нарсани хотирлай олмаяпман” деган мазмунда жавоб қайтарган.

 “Ўзимни анча яхши ҳис қилаяпман. Аҳволим тузук”  дея Урлаева маслакдошлардан беҳуда ташвиш чекмасликларини, ортиқча ҳавотир олмасликларини сўраган.

– Юз-кўзида ўта ҳорғинлик ва толиқиш шундоққина уфириб турган Елена Михайловна биз билан синиқ табассум-ла хайралшди, – дейди М. Эшонқулова.- Аввало, Урлаева 8-март – Халқаро Хотин-қизлар байрами куни уз оиласи даврасида бўлишини чин дилдан истаймиз ва Яратгандан шуни сўраймиз. Мабодо, байрам кунлари уларга жавоб бегмагудек бўлса, биз Елена Михайловнани ёлғизлатиб қўймаймиз.

“Бирдамлик” Халқ Демократик Ҳаракати Ўзбекистон бўлими матбуот хизмати

http://birdamlik.info/blog/2014/03/06/урлаева-билан-учрашув/