“ЖУРНАЛИСТНИНГ НОНИ ҚАТТИҚ”МИ?

Ўзбекистонда нишонланадиган “Матбуот ва ОАВ ходимлари куни муносабати билан, “Эрудит” газетасининг оҳирги сонида “Олтин қалам” соҳиби, журналист Тўлқин Эшбековнинг фикрлари ёритилибди. Унга мухбир биргина савол билан мурожаат қилибди:

-“Жўрналистнинг нони қаттиқ” дейишади, сиз бунга нима дейсиз?

-Бу гапни анча йил илгари ёши каттароқ журналистнинг ёзганини ўқиб энсам қотган.

Очиғи бу беўхшов гапни асло “ҳазм” қила олмайман. Эътибор қилинг, нима дегани у? Журналист нонини қийналиб топади демоқчими?

“Касбидан нолиганнинг қорни нонга тўймаскан” деган илмоқли гап ҳам қулоққа чалинган. Анча жўяли гап. Нолийдиган бўлсанг, ана катта кўча! Ўзинга ёққан бошқа касбни этагидан тутиб кетавермайсанми?… Мен учун журналистиканинг нонидан лаззатлироғи йўқ. Айни пайтда мураббий сифатида фаолият олиб бораётган бўлсам-да журналистикадан асло узоқлашганим йўқ. ( Ие, бу киши нега ўзлари журналистикадан кетдилар экан?).

Ҳуллас, “Жўрналистиканинг нони қаттиқ” деганда Эшбеков тилга олган кекса журналист гапининг мазмуни қуйидагича. У киши – Журналист билиб-билмай бирон-бир раҳбарни танқид қилиб қўйса ёки бирор бир фельетон ёзиб қўйса тазйиққа учрашини қаттиқ нон ейишга қиёслаган бўлиши керак. Ҳар ҳолда совет даврини кўрган инсонда.

Машҳур журналист Жозеф Пулитцер кунларнинг бирида ўзини жинниликка солиб, жинниҳонага киришга мувофиқ бўлади ва у ер ҳақида жанжалли мақолаларни чоп этади. Тўғри ҳозир жиннихоналарга кириш у қадар қийин эмас, лекин у пайт учун жиннихонага кириш катта қаҳрамонлик бўлган. Мана буни “қаттиқ нон” ейиш деса бўлади.

Агар юқоридаги фикрларни билдирган укамиз мазза қилиб юмшоқ нон еяётган эканлар, марҳамат, у кишига ҳеч ким тўсқинчилик қилмайди. Иложи бўлса ўша юмшоқ нонларига сариёғ, асал ҳам қўшиб есинлар.

Носир Зокир
Ўзбекистон Инсон Ҳуқуқлари Жамиятининг Фарғона водийси бўйича мувофиқлаштирувчиси
4-июль , 2014-йил.