КРЕМЛЬ ЭСКИ НАЙРАНГЛАРИНИ БОШЛАМОҚДА

Россия дунёга келибдики, доимо босқинчилик билан шуғилланиб келган. 19-асрнинг ярмидан ўтиб турли найранглар билан Туркистонни босиб олди.1956-йил Венгрияга бостириб кирди.1968-йил Чехияни қўлдан бой бермаслик учун у ерга ҳам армиясини олиб кирди. 1979-йил Афғонистонга бостириб кирди. Собиқ иттифоқ тарқаб кетгач, мустақиллик учун курашга чоғланган Чеченистонни хонавайрон қилди. Унинг лидерларини қатл этди. Энди Украинага бостириб кириб, зўровонлик билан Қримни қўлга киритди ва кейинги воқеалар шуни кўрсатмоқдаки, ўрис энди Украинанинг русийзабонлар кўпроқ яшовчи вилоятларида фитна уюштириб, вазиятни чигаллаштириб, Украинани бўлиб ташлашга ҳаракат қилмоқда. Қримнинг Украина сафидан чиқиб мустақил бўлишга ҳаққи бор экан, Татаристон ва Чеченистонни мустақил бўлишга ҳаққи йўқми? Агар у ерда ҳам озодлик учун ҳаракат бошланса, Путин дарров АҚШини айблай бошлайди.

Бугун Россия раҳбарияти бошқа МДҲ давлатларидаги ҳамтовоқлари сингари, ўзининг ОАВрида ўзини-ўзи мақташни бошлаб юборди. Куни кеча Россияни Овропа иттифоқи делегациясига раҳбарлик қилган Алексей Пушков: – “Бизни Овропа иттифоқига кирувчи давлатлардаги коммунистлар қўллаб қувватлашди.Агар Овропа иттифоқи бизга қарши учинчи санкция, яъни иқтисодий санкцияни эълон қилса биз ҳам бунга қарши тайёргарлигимизни кўриб қўйганмиз. Биз Шарқ давлатлари билан алоқаларни бошлаймиз”-деди. Ташқи ишлар вазири Лавров эса “1991-йил СССРни тарқатиб юбориш ноқонуний бўлган”-деди.Бу фикрларни хаттоки Россия коммунистларининг раҳбари Зюганов ҳам мақтаб, интервью берди. (ахир бу шармандалик-ку) Биласизми, улар бу сўзлар билан улар нималар демоқчи?

Энди мана бу ҳангомани қаранг. Ҳозирги кунда МДҲ давлатларининг раҳбарлари ўзларини сиёсатларини халқ, “демак бизни раҳбарларни чет элликлар ҳам қўллааяпти эканда”- деган фикрга боришини назарда тутиб, чет эллик баъзи сиёсатчиларни пулга сотиб олиб, ўз ОАВларида сиёсатларини мақташяпти.Бундай найрангбозликни, “тупик”ка кириб қолган Путин ҳам қўллай бошлади.Биласиз Путин кўп йиллар мобайнида Германияда бизга ўхшаган демократия тарафдорларини ортидан айғоқчилик қилиб юрган. Бутун жаҳон ОАВлари Украинадаги тинч намойишлар даврида намойиш иштирокчиларига қарата Россия маҳфий хизматлари ўқ отганини исботлаб берган эди. Бундан жумбушга тушган Путин Германиядаги ОАВларини эркин эканлигидан фойдаланиб бўлса керак,бу давлатдаги қайсидир телеканал орқали намойишчиларга қарата ўқни Украин миллатчилари отган деган мазмундаги кўрсатувни уюштирди. Маълумки Ангела Меркелъ Овропа иттифоқи таъсирида Путинни Украина қарши сиёсатини қоралаган эди. Эҳтимол юқоридаги кўрсатувни ўзини Путин олдида оқлаш учун собиқ комсомол хоним ўзлари уюштириб бергандирлар. Яна ким билади дейсиз.

Россия раҳбарлари Украина томонини, уларнинг ОАВларини у ерга қўймаётгани ҳақида бонг урмоқдалар. Ҳозир кўриб ўтирибман, Россия ОАВлари вакиллари Украинада бўлаётган барча воқеаларни, ҳаттоки Рададаги муҳокамаларни ҳам кўрсатишмоқда. Буни қандай тушиниш мумкин? Буни қандай тушинишни мен яхши биламан. Ўйлайманки, Сиз ҳам яхши тушинасиз. Бу, Путиннинг навбатдаги мантиқсиз найрангларидир.

Озгина мозийга қайтиб шуни айтишимиз керак-ки, Николай икки “софини ўзидан чиқариб”, ўзимизнинг сотқинлар Қодирқул ва Яъкуб қўли билан Дукчи Эшонни ушлаб чидаб бўлмас қийноқларга солиб қатл этди. Коммунистлар эса Николайни ўзини у, Дукчи эшонни қандай қийнаб ўлдирган бўлса ҳудди шундай оиласи билан қийнаб ўлдирди. Дукчи Эшон Қодирқулни: “Илоҳим ўзингни-ўзинг уриб, жинни бўлиб ўлгин!”-деб дуоибат қилган эди. Қодирқул ўзи хизмат қилган ўрислар томонидан ишдан ҳайдалиб, жинни бўлиб, ўзини-ўзи уриб ўлди.

Биз Дукчи Эшонни озодлик учун ҳаракатларини деярли унутган вақтимизда ўрислар Николай иккини мазлум қилиб кўрсатиб, уни номини абадийлаштиришга ҳаракат қилмоқда. Бу нима дегани? Бу дегани Николайни босқинчилик ва зўравонлик сиёсатини қўллаш дегани. “Биз ҳам шу йўлдан бораверамиз”- дегани.

Россия асрлар давомида қилган босқинчиликлари учун жавоб берадиган замонлар яқинлашмоқда. Агар Украинага нисбатан шу сиёсатини давом эттираверса, вақтлар келиб Россиянинг ўзи парчаланиб кетиши тайин. Бунинг учун Овропо иттифоқи ва ғарб давлатлари тезда иқтисодий санкцияни (агар ҳар қандай иқтисодий зарар бўлса ҳам) эълон қилиши, Пушков айтгандек:” Шу йилнинг охирига бориб, ҳалқаро жамоатчилик ҳам, бизга қарши кучлар ҳам тинчиб қолади”- дегандек тинчиб қолмай Россия агрессиясига қарши курашни тинимсиз давом эттириши керак.

Россиянинг шундай тажовузкор сиёсатини давом этдиришига, МДҲ давлатларининг раҳбарлари ва ҳаттоки биз муҳолифатчилар ҳам сабабчимиз.Биримиз ҳанузгача Кремлъ сиёсатидан қўрқаяпмиз, биримиз ўз ички муаммоларимиз билан андармон бўлиб, асосий душманнинг азалий найрангларини унутдик.Шуни эсдан чиқармайлик, бутун дунё жамоатчилиги Россия парчаланиб кетмагунча терроризм хавфидан, уруш ва жанжаллардан боши чиқмайди.

Мақоламни тугатиб, “Озодлик”ни эшитдим. Унда, кўпчилик мухлисларнинг эътиборини қозонаётган “Қурултой” дастури берилди. Унда Украина воқеалари муҳокама қилинди. Унда иштирок этган аксарият дўстларимизнинг фикрлари бугунги мақоламизда ёзганларимизга ҳам оҳанг бўлди. Дастурни эшитиб, шу дастурда иштирок этмаганимга афсус чекдим. Анча гаплар бор эди.

 Носир Зокир

 Ўзбекистон Инсон Ҳуқуқлари Жамиятининг Фарғона водийси бўйича мувофиқлаштирувчиси

16– апрель, 2014-йил.