РОССИЯ МАТБУОТИНИНГ АСЛ БАШАРАСИ О Ч И Л Д И

Россиянинг босқинчилик сиёсати оқибатида Украинада рўй бераётган воқеалар Ўзбек матбуотида деярли ёритилмаяпти. Украина воқеалари бошлангандан кейин Россия матбуотини ҳам асл башараси намоён бўлди. Ленин хокимиятга келибоқ биринчи қилган иши телеграф ва бошқа матбуот органларини қўлга олиш бўлган эди. Путин ҳам бобосининг сингари 2000- йили хокимиятга келгач биринчи иши НТВ сингари мустақил телевиденияларнинг акцияларини кўпини ўз ғоядош бойваччаларига олиб бериш бўлган эди.

Украина воқеалари бошлангач Россиянинг ҳамма телеканаллари Путин сиёсатини тарғиб қила бошлашди. Охири,телеканаллар орқали берилаётган ёлғон хабарларга тўла материалларни кўрсанг кўнглинг айнидиган даражага бориб етди. Путин Қримни қурол йўли билан қўлга киритгач, дарров Украина ОАВларини уздириб қўйди. Украинлар ёлғон, бир томонлама ахборотларга тўла Россия телеканалларини узиб қўйгач эса, дунёга жар сола бошлади. Бундай ҳолатда кабель телевидениеларини кўраётган Ўзбекистонликларни Украина борасидаги фикрлари ҳам Россия телевидениеларда берилаётган сохта маълумотлар орқали шаклланиб борди. Бизга ўхшаган оз сонли зиёлилар ва айрим оддий кишилар ҳолис аҳборотни “Озодлик” , “Бибиси” ва “Евронюс” каби ОАВ лари орқали олаяпмиз.

Бундай шароитда биз зиёлилар Қримда яшаётган миллатдошларимиз Қрим татарларининг аҳволидан хавотирда эдик. Чунки аксарият Қрим татарлари Россиянинг босқинчилик сиёсатини қўлламаган эдилар. Куни кеча Қримда яшаётган онасини кўргани борган Наманганлик Рамиль билан учрашган чоғимиздаёқ татарларнинг аҳволи билан қизиқдик. Унинг айтишича Ўрислар татарларга қаттиқ тазйиқ ўтказиб, ҳатто уларни ҳарид қилгани магазинларга киришса, улар билан савдо қилмай оҳирги навбатга қўйиб қўяётган эканлар. Айниқса турмаларда ётган татарларга нисбатан зўравонлик қилаётган эканлар. Рамильнинг айтишича кўпчилик татарлар бундай тазйиқлардан қўрқиб Украинага ўтиб кетаяпдилар. “Нималардир қилиб миллатдошларимизга ёрдам берилмаса бўлмайди”-деди Рамиль.

Путиннинг ғоядоши, жаллод Сталин иккинчи жаҳон уриши пайтида Қрим татарларини Ўрта Осиёга қувғин қилган эди. Путин эса ўз ғоясини қўлламаган татарларни қувғин қилиб, уларни қаттиқ сиқувга олаяпти. Путин орқага қайтмайди. Ғарб ва ғарбий Овропа мамлакатлари, ҳалқаро ташкилотлар ҳам орқага қайтмайди.Бундай шароитда,бизнингча ҳалқаро ташкилотлар сиёсий санкциялар билан чегараланмасдан, ҳар қандай зарар бўлса ҳам тезда Россияга қарши иқтисодий санкцияларни жорий қилишлари керак. Бизга ўхшаган кишилар эса Қрим татарларининг бугунги аҳволидан бутун дунёни огоҳ этиш орқали уларга кўмаклашишимиз зарур.

 Носир Зокир

 Ўзбекистон Инсон Ҳуқуқлари Жамиятининг Фарғона водийси бўйича мувофиқлаштирувчиси

3– апрель, 2014-йил.