Дунё тарихида бунақаси кам бўлса керак. 1990 йилнинг июнь ойида Қирғизистоннинг Ўш ва Ўзган шаҳарларида маҳаллий ўзбекларга қарши уюштирилган кўз кўриб қулоқ эшитмаган қирғин орадан 20 йил ўтиб, айнан июнь ойида яна қайталанди. Яна қурол  – яроқсиз, ҳимоясиз ўзбеклар қирғиз миллатчи фашистлари томонидан шафқатсизларча қийнаб ўлдирилди, тириклайин ёқилди, аёллар даҳшатли қийноққа солиндилар, зўрландилар, минглаб кишилар  ўз ватанларини ташлаб кетишга мажбур бўлишди. Олдин ҳам бу қирғин бошида турган жиноятчилар жазоланмай қолиб кетганди. Бу гал ҳам шундай бўлди. Ўз уйини, ватанини босқинчилардан ҳимоя қилиш йўлида курашган ўзбеклар жиноятчига чиқарилди, ҳужум қилганлар эса қаҳрамонга айлантирилди.

Тарих чархпалаги тескари айлантирилмоқдами? Бу адолатсизликларга чора кўрувчи кишилар йўқми? Нега бутун дунё бу ошкора қотиллик қаршисида сукутга чўмган? Нега халқаро жамоатчилик жим?

Аслида биз яшаб турган дунё у қадар адолатсиз эмас. Ҳамма нарсанинг ўз ўрни ва ўз жойи бор. Бир кун келиб яширин сирлар ошкор бўлади. Бир кун келиб жиноятчилар албатта жазога тортилади. Бунинг учун ҳали вақт бор…

Шундай деб ўзимизни овутишимиз мумкин. Аслида адолатсизликларга қарши кураш олиб бормасдан, ҳеч нарсага эришиш мумкин эмас. Ёвузликка қарши курашиб ғалаба қозониш мумкин.  Курашмасдан , қўлни қовуштириб ўтирган билан ҳеч нарса ўзгармайди.

Бугунги кунда Қирғизистондан чиқиб кетган юзлаб миллатдошларимиз ҳамон қўрқув билан яшашмоқда.  Уларнинг аксарияти қандай қилиб бўлса ҳам қирғиз миллатчилари билан муросага бориб, тинчгина яшаш тарафдори. Баъзи ўзбеклар қонга қон, жонга жон, дея, қасос олишни кўнгилларига тугиб юришибди. Кўпчилик миллатдошларимиз эса ҳеч нарса қилмасдан кутиш керак, дея вазият яхшиланишига умид қилиб ўтиришибди.

Ўшда ва Жалолободдаги вазият эса ҳамон ўзгаргани йўқ. Ҳамон ўзбекларга қарши миллатчи тўдалар тиш қайрамоқда.  Ҳамон ўзбекларга нисбатан зўравонликлар кучайиб бормоқда. Асоссиз айблар билан жазога тортилаётган, таланаётган, ўлдирилаётганлар ҳам асосан ўзбеклардир.

Бугунги вазиятдан келиб чиқиб, дунё бўйлаб сочилиб кетган ўзбеклар Қирғизистонлик миллатдошларимизни ҳимоя қилиш, уларни ҳақ ҳуқуқларини тиклаш, адолатни қарор топтириш мақсадида бундан кейин узлуксиз норозилик акциялари бошлашга қарор қилдилар. Шу йилнинг 11 июнь кунидан бошланадиган сиёсий акциялар дунёнинг қатор шаҳарларида бўлиб ўтади. Дунё ўзбеклари сиёсий қатлами ташаббуси билан ташкил қилинадиган акциялар АҚШнинг Нью Йорк шаҳрида, Лондонда (Британия), Женевада (Швецария), Брюсселда (Белгия) , Киевда (Украина), Москвада (Россия), Стокҳолмда (Швеция), Тошкентда (Ўзбекистон), Истамбулда (Туркия) ва бошқа шаҳарларда бўлиб ўтади. Аксияга қатнашиш истагини билдирганлар учун қўшимча маълумотлар тез кунларда эълон қилинади.

Қирғизистонда яшаётган жабрдийда миллатдошларимиз тақдирига бефарқ бўлманг. Бугун фақат дунё ҳамжамияти иштирокида қирғиз фашизмига барҳам бериш мумкин. Норозилик пикетларида қанча кўп киши иштирок этса, акциялар кўлами шунча ортади. Бу билан Ўш ва Жалолободда яшаётган ўзбеклар қалбига умид чироқларини ёқамиз. Бу билан миллатчи ва фашист қирғиз тўдаларини сергак тортиришимиз мумкин бўлади. Бу билан халқаро саҳнада ўзбеклар нуфузи ортишига ҳисса қўшган бўламиз.

Четда турманг, акциямизга қўшилинг. Зеро, ўзбеклар ўлдирилаётган, қийноққа солинаётган, тириклайин ёқилаётган бир пайтда қирғиз миллатчилари жиноятларига бефарқ, томошабин бўлиб туришнинг ўзи катта жиноятдир.

Ташаббус гуруҳ аъзолари. Швеция, 2012 йил, 3 июнь.
www.yangidunyo.com

http://yangidunyo.com/?p=1436#more-1436