08.12.2011

7 декабр куни кечқурун ҳибсга олинганлар орасида Ўзбекистон Инсон ҳуқуқлари жамиятининг Чироқчи тумани фаоли Нурали Кўлобов, Эзгулик жамиятининг Чироқчидаги фаоли Абдумурод Норбоев ва яна уч киши бор.

Бу ҳақда Ўзбекистон Инсон ҳуқуқлари жамиятининг Қашқадарё вилоят бўлими раиси Гулшан Қораева Озодликка маълум қилди.

– Кеча уларни Чироқчи туман ҳокимиятига чақиришган. Боришса уларни 30-40 га яқин милиция ходимлари ва номаълум аёллар кутиб олган. Кейин ўша аёллар провокация қилиб, жанжал чиқарган. Шундан кейин беш кишини олиб кетишган, деди Гулшан Қораева.

Чироқчи туманидаги 20 та қишлоқ аҳли 8 декабрдан бошлаб ҳокимият биноси олдида норозилик намойиш ўтказишни режалаштирган эди.

Гулшан Қораевага кўра, беш кишининг ҳибсга олиниши айнан ушбу норозилик намойишини олдини олиш мақсадида қилинган.

– Ноябр ойидан бери булар прокуратурага, республика аппаратларига ҳамма ëққа чироқ йўқ, газ йўқ деб шикоят аризаси билан мурожаат қилишган. Кейин билдириш хатлари тарқатишган. Айнан чироқ, газ йўқлиги учун норозилик акцияси ўтказамиз¸ деб билдириш хати тарқатишган эди. Айнан шу масалага бориб тақалаяпти ҳозир. Ҳукумат норозилик акцияси уюштирилмаслигига қарши чора кўраяпти, деди Гулшан Қораева.

Ҳуқуқ фаоли Нурали Кўлобов 6 декабр куни Озодлик мухбири билан суҳбатда намойиш режаси ҳақида гапира туриб, ташаббусчиларнинг ҳибсга олиниш хавфи мавжудлигини айтган эди.

– Бизнинг ўрганишимиз бўйича хотин-қизлар, қариялар жуда қийналишган. Ҳаммаси борамиз, намойиш қиламиз¸ дейишаяпти. Энди давлатда кимлардир иғво қилиши мумкин, балки бизларни қамашга ҳаракат қилиши мумкин, балки ваҳҳобий дейиши мумкин, шундай ҳаракатлар ҳам бўлган. Устимиздан маҳалла раислари ëзиб берган. “Бу ваҳҳобий, Ҳизбут-Таҳрир гуруҳига аъзо” деган хатларни берган. Шахсан менинг устимдан берилган. Худди шундай ҳаракатлар яна бўлиши мумкин. Худодан¸ пешонада борини кўрсатади. Ҳаракат қиламиз охиригача бориб курашишга, деган эди ҳибсга олинишидан бир кун аввал  Озодлик билан суҳбатда Нурали Кўлобов.

Кўлобовнинг яқинларига кўра, ҳибсга олинган чироқчилик беш киши Чироқчи туман Ички ишлар бўлимида ушлаб турилибди.

Озодлик бу борада Чироқчи ИИБдан бирор маълумот олиш имконига эга бўлмади.

Чироқчи туман газ ва электр тармоқлари идораларининг раҳбарлари Озодлик билан суҳбатда туманда газ ва чироқ муаммоси борлигини тан олиб, айни пайтни ушбу муаммони бартараф этиш имконсизлигини айтишган эди.

http://www.ozodlik.org/content/article/24415870.html