САРОСИМАДА ҚОЛГАН ҲУҚУҚ ИДОРАЛАРИ ЧОРИЕВЛАР ОИЛАСИГА ШАНТАЖ ҚИЛИШГА ЎТДИ

 

 

Дарвоза очиқлигидан фойдаланиб ҳовлига бостириб киришга муваффақ бўлган ва “Бизга Матлубани топиб берасизлар! У қаерда,топмасанглар уйингларга ўт қўямиз?!” деган даҳдид билан сўз бошлаган аёллар Чориевлар оила аъзоларини  оғизга олиб бўлмайдиган сўзлар билан сўкиб,даҳанаки жангдан қўл жангига зўр беришди.

 

 

Ҳовлига бостириб кирган бир тўда нотаниш аёлларнинг кутилмаган ҳужумидан саросимага тушиб қолган Зулайҳо Чориева зудлик билан ҳуқуқ фаоли Шуҳрат Рустамовга,шунингдек,“Бирдамлик” ХДҲ Ўзбекистон бўлими етакчиси Малоҳат Эшонқуловага ҳуқуқий маслаҳат сўраб сим қоқди.

 

 

-Уйга бостириб кирган аёлларнинг провокациясига алданиб қолманглар. Уларнинг шаллақиларча айтаётган ҳақоратли сўзларига ҳақорат  билан жавоб қилманг. Ёлланган аёлларнинг зўравонлик билан куч ишлатишлари,уришларига қарши бирортангиз асло қўл кўтара кўрманг. Имкони борича зудлик билан “02” га қўнғироқ қилиб,уйга нотаниш аёллар бостириб кирганлиги ва зўравонликка зўр беришаётганлари хусусида хабар бериб,кўмак сўранг. Ички ишлардан кўмак келмагунча қўнғироқ қилишни тўхтата кўрманг. Иложи бўлса,шантаж қурбони бўлмаслик учун чор-атрофдаги қўшниларни тезликда гувоҳликка чақиринг. Видеога олиш имкони бўлса,воқеликни тасвирга туширинг. Жуда имконсиз қолган тақдирингизда уйингиз,ҳовлингизни ташлаб,кўчага,одамлар гавжум жойга чиқинг,–дея маслаҳат берди ҳуқуқ фаоли Шуҳрат Рустамов.

 

 

 Ш. Рустамовнинг маслаҳатига амал қилган Чориевлар оиласи зудлик билан “02” га қўнғироқ қилиб,вазият ҳақида ахборот бериш учун сим қоқишди. Бироқ “02” Ўзбекитсондаги азалий одатга кўрами,ёки атайми,хуллас,ҳа деганда гўшакни кўтаравермади. Чориевалар ҳамон “02” билан боғланиб,милициядан кўмак сўраш илинжида қўнғироқ қилиш билан ҳалак.

 

 

Қашқадарёнинг “02”си ишлайдими,йўқми,Чориевлар оиласининг қўнғироғига жавоб берадими,бермайдими,бу масаланинг бошқа бир жиҳати.

 

 

Бироқ. Биз масаланинг ўзга бир қиррасига – Матлуба масаласига урғу беришни истардик.

 

 

27 июнь куни мустақил журналист Малоҳат Эшонқулова ҳамкасблари ва Қаршилик ҳуқуқ фаоллари билан Матлуба исмли қизни қидириб топиш юзасидан журналистлик суриштирув ишларини олиб борган эди.

 

 

– 28 июньдан 29 июньга ўтар кечаси Шаҳрисабзга Тошкентдан бир ҳамкасбим етиб келди. Уни кутиб оларканман (илтимосига биноан унинг исмини очиқлашни лозим топмадим) ҳамкасбим менга қарата:

 

 

“Эшонқулова,негадир барчангиз ёшини яшаб,ошини ошаб бўлган кекса киши Ҳасан Чориевнинг манфаатлари,айбсиз айбдорлиги ҳақида бонг урасиз. Аммо 19 ёшли,номуси топталганлиги иддао қилинаётган бир қизнинг тақдири ҳақида ҳечам қайғурмаётгандексизлар. Ахир ўша ёш қиз ҳам Ўзбекистон фуқаросику,ахир унинг ҳуқуқларини ҳам ҳимоя қилишга кимдир киришиши керак-ку? Мана,сиз ҳамкасб – журналист сифатида менинг позициямни тушунасиз деб ўйлайман.

 

Мен Қаршига Матлубани топиш,у билан суҳбатлашиш ва масалага ойдинлик киритиш учун,журналист текшируви ўтказиш учун келдим. Мабодо,ҳақиқатдан ҳам Матлубанинг номусига тажоввуз қилинган бўлса,айбдорлар албатта жазосини олишлари учун,Матлубани ҳимоя қилиш учун қўлимдан келганича ҳаракат қиламан” деди ҳамкасбим.

 

 

– Мен ҳам ҳақиқатнинг тагига етишни,Матлуба билан юзма-юз бўлишни истардим. Илло мақсадимиз ҳам шу. Сизнинг фикрингизга тўла қўшиламан,–дея жавоб қилдим ҳамкасбимга.

 

 

Эртаси куни тонгда ҳамкасбимга ҳамроҳлик қилишга аҳд қилдим. Биз Матлуба исмли қизнинг қишлоғини қидириб кетдик.

 

 

Матлуба туғилиб ўсган хонадонни топдик ҳам.

 

 

Шуни алоҳида таъкидлашни истардимки,ўша Матлуба Абдураҳмонова (суд ажримида гоҳо Абдураҳмонова,гоҳо  Абдураимова деб қайд этилаётган) нинг волидаи муҳтарамаси (келинг,бир аёл – она шаънини топтамаслик,бир ҳокисор аёлга озор етказмаслик учун у истиқомат қилаётган қишлоқнинг номини ҳам,аёлнинг исмини ҳам атоқламасдан қўя қолайлик,майлими) ниҳоятда ҳокисор,камтар,камсуқум,беозор аёл экан. Ҳаётнинг жамики жабринининг таъмини татиб кўрган бағри хун ўзбек аёли қиёфаси бўлса худди мана шу –қаршимизда турган беозор она сиймосидек бўлади агар билсангиз.

 

 

Турмуш ўртоғи оламни эрта тарк этганлиги сабабли 7 нафар қизини ёлғиз ўзи оёққа турғазиш учун    егани заҳар заққум,кийгани кафан бўлган бу аёлнинг рухсориёқ унинг чексиз уқубат чекканлигидан далолат бериб турарди:онанинг эти суякларига ёпишиб кетган,қуруқ скелети қолганди холос.

 

 

Шусиз ҳам жони қийноқда қолган онани янада азоблаш инсофданми? Йўқ,албатта. Бироқ,биз вазиятга аниқлик киритиш учун она билан очиқча гаплашишга мажбурмиз. Шундай ҳам бўлди. Онадан қизи Матлуба ҳақида сўрадик.

 

 

– Қизимнинг уйдан чиқиб кетганига уч йил бўлган. Қаерда эканлиги номаълум,бизга яшаш манзилини ҳам,телефон рақамини ҳам бермаган. Гоҳо Тошкентда,гоҳида Қаршида яшаяпман деб хабар қилиб қоларди. Баъзан ўзи турли рақамлардан қўнғироқ қилиб туради. У қилган рақамни қайта терсак,“Бундай рақам тармоқда йўқ” деган жавобни эшитамиз. Кейинги хабарларга кўра,қизим Самарқанддан янги иш топиб,ўша ерга кўчиб кетган бўлиши керак,янаям аниғини билмайман,–деди онаизор.

 

 

Биз кимнингдир шахсиятига тегмоқчи,шаънини топтамоқчи эмасмиз. Лекин онасининг гапи мазмунидан,умид қиламанки,Матлуба хусусида маълум маънода тасаввурга эга бўлдингиз.

 

 

Онаизорнинг гувоҳлик беришича эри вафот этгач,Ҳасан Чориевнинг чорвачилик фермасида сут соғувчи бўлиб кун кўрган. 1994 йилда таваллуд топган иккинчи қизи Матлуба эса онасига болалигиданоқ кўмак бериш мақсадида умрининг асосий қисмини она ортидан эргашиб чорвачилик фермасида ўтказган.

 

 

– Опажон,айтингчи,мана,сиз Ҳасан отамизни танир экансиз. Шу одам 19 ёшли қизингиз Матлубанинг номусига тажоввуз қилиши мумкинми? Шу гапга ишонасизми? – деган саволимизга аёл шўрлик карахт бўлиб қолди.

 

– Нима учун менга бундай қўрқинчли гапларни гапираяпсиз? Мен еттита етим қизимни ўзим емай едирдим,киймай кийдирдим,камбағал бўлсам ҳам бировлардан кам қилмай деб куйиб ёндим,елиб югурдим. Умид билан улғайтирган боламнинг номуси барбод бўлган демоқчимисизлар? Бу бўлмаган гап. Барчаси уйдирма. Ишонмайман. Бўлиши мумкин эмас,–деди ичи тутдек тўкилиб кетган она нигоҳлари умидли жовдираб.

 

 

Унинг сўзларидан англаганимиз шу бўлдики,она қизи Матлубанинг тақдиридан,бугунги гап-сўзлардан мутлақо бехабар.

 

 

Ноилож онага Жиноят ишлари бўйича Қарши шаҳар судининг эҳтиёт чораси сифатида Ҳасан Чориевни хибсда сақлаш тўғрисидаги ажримини кўрсатишга мажбур бўлдик.

 

 

Она бехуш йиқилишига бир баҳия қолди.

 

 

– Бу бўлмаган гап. Кимларнингдир туҳмати,иғвоси бўлса керак. Ҳасан Чориев хотини билан уйимизга бир-неча бор келган. Мен у одамдан умуман ёмонлик кўрмаганман. Қизларимга ола қараганиниям билмайман,-  игранди она. (суҳбат матнини ўзим учун диктафонга ёзиб олгандим….)

 

 

Онадан узр сўраб,хайрлашдик.

 

 

Кейин Тошкентдан Матлубанинг манфаатларини ҳимоя қилиш учун келган ҳамкасбим,Қашқадарёлик ҳуқуқ ҳимоячилари Гулшан Қораева,Нодир Аҳатов,ҳуқуқ фаоли Шуҳрат Рустамовларнинг ҳамроҳлигида “номусга тегиш жинояти содир этилган” деб кўрсатилган ва “Матлуба вақтинча истиқомат қилган”лиги суд ажримида иддао қилинган манзилни – Қарши шаҳар,Пахтазор митти туманидаги ўша “машҳур” хонадонни қидириб кетдик.

 

 

Қидирув давомида биз ёлғиз эмасдик. Бизга икки номаълум аёлларга лиқ тўла икки дамас ва иккита некция,битта жигули,битта матиз автомашиналари ҳамроҳлик қилишарди. Бу “қора кучлар” бизни вилоят прокуратураси биноси  олдида кутиб туришган экан. Улар вилоят прокуратураси олдидан бизнинг изимиздан тушишганди.

 

 

Икки дамас барзанги аёлларга кўзим тушиши билан,улар бизга провокация уюштириш учун  ёлланган махсус аёллар эканлигига ақлим етганди.

 

 

Шу сабаб ҳам “Матлуба яшайди дейилган уйнинг ҳовлисига тушишимиз билан мана бу икки дамасдаги аёллар бизга ташланишади. Изимиздан қолишмаяптику? Менинг нима жоним бор,бир туширишса,хушимдан кетаман. Балки Матлубани қидириб Пахтазор митти туманига бориш шарт эмасдир,ўз туққан онаси қаерда эканлигини билмас экан,Матлубанинг қаерда эканлигини биз қаердан биламиз? Уни қай тешикдан қидирамиз?  Уни қандай топамиз?  Матлуба билан учрашамиз деб бирор бир туҳматга қолмайлик,ана у барзанги аёллардан таёқ еб қолмайлик. Уриб,қонимизга бўйаш билан чекланишса кошки эди! Ҳам қалтаклашади,ҳам камига судга судраб,тавон тўлатишади. Бирор бир балога –туҳматга гирифтор қилишмасин яна. Кўнгилсизлик кимга керак?”,дедим ҳамроҳларимга ёлвориб.

 

 

Лекин ҳуқуқ фаоллари Гулшан Қораева ва Нодир Аҳатовлар бизга далда бўлишди,раҳмат уларга. “Қўрқманглар,биз бормиз. Биз ҳам камчилик эмасмиз? Бизни кузатишлари мумкин,лекин провокация қилишга ҳаддилари сиғмайди. Шунча йўл босдикми,Матлубани қидириб топишимиз шарт” деди Нодир Аҳатов.

 

 

“Ҳа,деган туяга мадат” деганларидек,Гулшан Қораева ва Нодир Аҳатовларнинг қўлловидан куч олиб,Матлуба яшайди дейилган хонадон томон йўл олдик.

 

 

Бироқ,биз излаган эшик қулф эди. Тақиллаттик,ҳеч ким жавоб қилмади. Шундан кейин ўша қаватдаги қўшниларни топиб,гаплашишга муваффақ бўлдик.

 

 

Бир эмас,3-4 қўшниларнинг гувоҳлик беришларича,“3- уйда яқин ўртада биров яшамаган. Матлуба исмлик ёш қизни эса мутлақо кўришмаган. Айтишларича,анчадан бери бу уйда ҳеч ким истиқомат қилмаган,уй бировга ижарага ҳам берилмаган. Мудом қулф турган…”

 

 

Шунда ҳовли рўпарасида ўтирган этикдўз жонимизга аро кирди.

 

 

“Шу уй эгасини танимайсизми? Уйларини сотиб олмоқчи эдик. Топа олмаяпмиз?” деган саволимизга у “Бу уйда ҳеч ким яшамайди. Уйнинг эгаси Наргиза опанинг “торговый центр”да дўкони бор. Сотувчи. Бориб,сўраб кўринглар” дея маълумот бериб қолди.

 

 

Этикдўзнинг гапи билан “торговый центр” деб аталувчи бозорга бордик. Наргиза бу бозорда канцтовар сотар эканлар. Аммо дўконлари қулф осиғлиқ эди. Шунда ёнидаги сотувчилардан Наргизанинг телефон рақамини сўрагандик,улар телефон рақамини билмасликларини,аммо у яшайдиган уйни кўрсатишлари мумкинлигини айтишди.

 

 

Севиниб кетдик. Наргизани ўзи истиқомат қиладиган иккинчи хонадонига йўқлаб,топиб борганимизда унинг ўзи бизни подъездда қарши олди.

 

 

Суҳбат давомида Наргиза опа Пахтазор митти туманидаги 26 уй,3- хонадон ўзининг шахсий мулки эканлигини тасдиқлади.

 

 

“Ўша хонадонда 12 июнь куни номусга тажоввуз қилиш жинояти содир бўлган экан. 71 ёшли отамиз  Матлуба исли 19 ёшли ижарачингизнинг номусига текканмиш” деган гапимиздан уй эгаси лол бўлиб қолди.

 

 

“Бир йилдирки мен уйимга на Матлуба деган қизни,на бошқа бировни ижарага қўймаганман. Ҳеч қанақанги Матлуба деган қизниям танимайман. Уйимнинг калити ўзимда бўлса,уни бирорта одамга бермаган бўлсам,менинг уйимда қандай қилиб номусга тегиш жинояти содир бўлиши мумкин?”,дея суҳбатдошимиз Наргиза карахт ҳолатда деворга   суяниб қолди.

 

 

Уй эгаси бу ҳақда бизга тушунтириш хати ҳам ёзиб бермоқчи эди,бироқ уйқусидан уйғониб кетган турмуш ўртоғи Фарҳорд рафиқасини ёзишдан тўхтатиб дарҳол участка нозирига кўз олдимизда сим қоқди ва:“Бу нимаси?  17 июнь куни Республика прокуратураси ходими билан мени бормайман деганимгаям қўймай,мажбуран  ўша уйимга олиб бординглар. Қарасам,бир чол билан бир ёшгина қиз ўтирганди. Мен уларни танимасам. Лекин “шунга кўнсанг,сени бошқа безовта қилмаймиз” деган ваъдаларингга,ёзма кафолатларингга ишониб,қандайдир экспериментларингда иштирок этдим,суратларга тушдим,сизлар номимни ошкор қилмасликка,безовта қилмасликка сўз бергандинглар. Мана,бугун уйимга ўша куни келтирилган қариянинг болалари келиб ўтиришибди. Бу ерда менинг гуноҳим нима?” деди аччиқ-тизиқ қилиб.

 

 

– Демак,Наргиза калитни бирор бир кимсага бермаган бўлса,ундан чиқди ўша уйингиз калитини Матлуба деган қизга сиз берган экансизда?,–деган саволимга Фарҳод:

 

 

– Мен Матлуба деган қизни танимайман,ҳеч ким у уйда ижарадаям турмайди,турмаган ҳам. Улар калитни қаердан олганлариниям билмайман. Менгаям хотиржамлик керак. Уларнинг гапига кўнмасам,мениям тиқиб қўйишларидан қўрқаман,–деди Фарҳод бизни жеркиб.

 

 

– Уй калитини бировга бермаган бўлсангиз,ИИБ ходимлари,прокуратура ва МХХ хизматчилари Матлуба ва Ҳасан отани уйингизга қандай қилиб олиб киришлари ва эксперимент ўтказишлари мумкин? Ҳарҳолда учиб киришмагандир тешик-туйнукдан? Бу ҳеч бир ақлга сиғмайдиган ишку? Наргиза,айтингчи,биздан нимани сир тутаяпсиз?,–сўрадим  аёлдан қизиқсиниб.

 

 

– Нимага гапимга ишонмайсизлар? Айтимку,яқин ўртада уйимда на аёл,на эркак ижарада турмаган деб. Мен ёлғон гапиришга қўрқаман. Мениям болаларим бор.  Менку ҳеч кимга ўша уйимнинг калитини бермаганман,бироқ ўша уйни мен бир йилларча илгари вилоят СНБсида ишладиган одамдан сотиб олганман. Сотиб олганимдан кейин уй “замоги”ни ўзгартирган эмасман. Балки уйнинг олдинги эгасида калит бордир? Балки ўша уйда яшамаслигимизни билган участкавойнинг ишидир бу? Милисаларни биласизку,нималарни уюштиришмайди. Милисалар уюштирган бўлишса керак буни,–деди Наргиза куюнчаклик билан.

 

 

У ўта ҳайронлик,соддалик,таажжуб ва айни дамда ўта  самимийлик билан гапирардики суҳбатдошимизга ишонмасликнинг имкони йўқ эди.

 

 

Лекин барибир турмуш ўртоғи Фарҳод гаплашган участка нозири телефон орқали бўлган суҳбатда Наргизага бошлаган аризасини тугатмасликка амир қилди.  Наргиза эса бизнинг илтимосимизга қулоқ солишни эмас,ўша Пахтазор митти туманининг участка нозирига сўзсиз бўйсунишни афзал ва хавф-хатарсиз деб билди.

 

 

Самимияти ва ростгўйлиги учун уй эгаси Наргизага ташаккур айтиб,ортга қайтдик….

 

 

Барча воқелик ва суҳбатлар мазмунини исталган жойда исботлаб беришим мумкин…..

 

 

27 июнь – Ўзбекистонлик журналистларнинг байрами куни бизнинг бир кунлик умримиш шу тариқа ўтганди…. Айтиш мумкинки,ниҳоятда мазмунли….

 

 

Хуллас,журналистлик суриштирувларимиз натижаси шуни кўрсатдики,“номусга тегиш жинояти содир этилган уйда”  Матлуба мутлақо яшамаган. Уни ҳеч ким танимайди.

 

 

Ҳасан Чориевга оид “жиноят иши”  Қаршқадарё вилоят прокуратураси,ИИБ ва МХХ ходимларининг – йўғ-э,уқувсиз “режиссёр”ларининг саҳналаштирган шунчаки спектакли бўлган холос. Бундан бошқа нарса эмас.

 

 

Ҳасан ота Чориевга оид “жиноят иши” тўлалигича уйдирма эканлигини аниқлаш жараёнидаги журналистлик  суриштирувимизда иштирок этган гувоҳлар бор.

 

 

Хўш,Қашқадарёнинг ҳуқуқ-тартибот идоралари ходимлари бундай гувоҳларни ўз йўлларидан қай тақлид олиб ташлашади энди?

 

 

Тошкентлик ҳамкасбимни таъқиб қилишадими,гувоҳ – Гулшан Қораеванинг эшитган қулоқларини юлиб олишадими,Нодир Аҳатовнинг кўрган кўзларини ўйишадими,менингдек гувоҳнинг сайраётган тилини кесишадими,Шуҳрат Рустамовнинг Қаршига қадам қўйган оёғини синдиришадими? Нима қилишади энди?

 

 

Мазкур суриштирув давомида қўлга киритилган инкор қилиб бўлмас далилий ашёларни тортиб олиш истагида такрор уйимга суд ижрочилари ниқобидаги босқинчиларни ташлашадими?

 

 

Видео ва аудио ёзувларга эга бўлиш учун яна бир бор уйимни “супириб” кетишадими?

 

 

Нима,мен шундай ноёб далилларни ўз уйида сақлайдиган ахмоққа ўхшайманми?

 

 

Ҳечам-да,мен қўлимдаги бор фактларни,далилларни аллақачон ишончли қўлларга топшириб улгурганман.

 

 

Энди ҳуқуқ идораларининг мени чув тушириш йўлидаги барча уринишлари зое кетиши аниқ. Хотама бўлишади.

 

 

Хулоса ўрнида шуни комил ишонч билан айтишим мумкинки,Қашқадарё вилоят ҳуқуқ-тартибот идоралари  ходимлари бир фуқарони  макр тўрига туширишганлари,кекса отанинг соддалигидан фойдаланиб,унга туҳмат уюштиришганлари аниқ.  Бу ҳақиқатни ўша Ҳуқуқ идораси ходимларининг ўзлари ҳам жуда яхши билишади ва Тошкентлик ҳамкасбим кўмагида,Қашқадарёлик ҳуқуқ фаолларининг гувоҳлигидаги олиб борган журналистлик суриштирувимиз натижаси қонун ҳимоячиларининг кирдикорларини тўла фош қилишидан улар ниҳоятда қўрқишади ҳам.

 

 

Худди ана шу қўрқув Қаршилик ҚОНУН поспонларини 3 дамас ёлланган аёллар билан бирга бугун,29 июнь куни соат 9.00 да Шаҳрисабздаги Ҳасан отанинг уйига бошлаб келган бўлиши ҳам мумкин.

 

 

Аслида ўша дамасдаги барзанги аёллар 27 июнь куни бизга – журналист суруштирувини ўтказаётган журналистларга,ҳуқуқ фаолларига қўққисдан ҳужум қилиши,таъзиримизни бериши режа қилинган эди.

 

 

Бироқ,ҳамроҳларимиз – гувоҳларнинг кўплиги уларни бунингдек ноқонуний режани амалга оширишларига халал берганди.

 

 

Буни қарангки,ўша куни бизни таъқиб қилган 2 дамас ёлланган аёллар бугун,  29 июн куни 3 дамасга айланиб,Шаҳрисабздаги Чориевлар хонадонига бостириб келганлар ва “Матлубани топиб берларинг!” деган сохта даъво билан таҳдид қилганлар,–дея журналистлик суриштируви хулосалари ҳақида ҳикоя қилади Малоҳат Эшонқулова.

 

 

Мустақил журналист фикрларига таянадиган бўлсак,Қашқадарё вилоят пркуратураси,МХХ ва ИИБ хизмати ходимларининг бунингдек провокация уюштиришдан муддаолари нима? Бундан уларга не манфаат?

 

 

Мақсад,улар Чориевлар уйида кутилмаганда жанжал чиқариб,Қашқадарё вилоят прокуратураси биноси олдида 3 июль куни  тинчлик йўли билан ўтказилиши режалаштирилган  норозилик намойишига тайёргарлик кўраётган Чориевлар оиласи вакилларини “БАНДИ” этишмоқчи! Шу усул билан намойиш иштирокчиларининг йўлига тўсиқ қўйишга эришишмоқчи!  Бор муддао ана шунда!

 

 

– Хўш,уйингизга “Матлубани топиб беринг” деган талаб билан келганлар “жабрдийда” қизнинг қандай қариндошлари экан,аниқладингизми?,–Ҳасан отанинг тўнғич қизи Зулайҳо Чориевани саволга тутдик

 

 

– Мен Матлубанинг онасини,опасини,сингилларини кўрганман. Уйимизга бостириб келган шаллақи аёллар ичида Матлубанинг ўзим танийдиган онаси ҳам,опаси ҳам,синглиси ҳам йўқ эди. Босқинчи аёлларнинг барчаси нотаниш. Худди ҳеч нарсадан қайтмайдиган жаллодга ўхшашарди. Ким билади бу аёлларни қаердан ёллаб келишган:эҳтимол фоҳишахоналардан топишгандир,балки “валютчик”ларни ишга солишгандир? Янаям шубҳалиси,ўша аёлларнинг ортидан пўрим кийиниб олишган 7 нафарга яқин  йигитлар ҳам кириб келишди. Улардан бири “Мен Матлубанинг тоғаси бўламан” деди. Биз Матлубанинг тоғасини ҳам танирдик. Ёши улуғ одам. Ёш йигитча эмас.  Қолаверса,Матлубанинг тоғаси  ночор оиладан,бу йигитлар каби оёғидаги патинкаси ярқирамайди. Уларнинг туфлисига эса гард ҳам тегмаган. Улар қандай қилиб Матлубанинг эркак қариндошлари бўлиши мумкин. Четдан пинҳона кузатиб туришларига қараганда,бу 7 нафар йигит МХХними,ИИБними ходимлари бўлиши керак деган гумоним бор, – жавоб қилди Зулайҳо Чориева.

 

 

Башоратчилик қобилиятимиз йўқ,фолбин эмасмиз,ром ҳам очолмаймиз. Бироқ,шу нарсага аниқ “диагноз” қўйишимиз мумкинки,воқеалар ривожини кузатиб зийрак бўлиб туринг,бугун Чориевлар хонадонига бостириб келган – маҳаллий ҳуқуқ-тартибот идоралари томонидан ёллланган 3 дамас барзанги аёллар 3 июль  –норозилик намойиши куни вилоят прокуратураси биноси олдида пайдо бўлишади ва кутилмаганда Чориевлар оиласи вакилларига ташланиб,хуморларидан чиққунларича дўппослашади. Ур-тўпалон бўлади,ҳали. Буни кўп йиллик ҳаётий тажрибамиздан келиб чиқиб айтаяпмиз.

 

 

Бу томошанинг хотимаси эса маълум:ИИБ ходимлари томонидан “отдел”га келтирилган Чориевалар оиласи вакилларига “майда безорилик” ёрлиғи топширилади ва улар суднинг жаримаси билан “сийланади”. 3 июнль куни кутилаётган “об-ҳаво ҳарорати” худди ана шундай “бўрон ва довуллар” бўлишини кўрсатмоқда.

 

 

“Номусга тегиш жинояти”  бўйича сценарий  ижод қилган нўноқ қонун поспонларига айтар сўзимиз эса шу:сценарийингиз “бадиий кенгаш”дан ўтмади,жаноблар!  Воқеалар кетма-кетлиги жудаям бўш,ишонарсиз,савияси жудаям саёз чиққан. “Чумчуқ сўйсаям қассоб сўйсин” деганларидек,  сценарий ёзишни ўз усталарига – ижодкорларга қўйиб беринг-да,театр саҳналаштириш машқини йиғиштиринг. Яхшиси ўз ишингизни қилинг:курсингизга муносиб бўлинг. Акс ҳолда ўтирган ўрнингиздан  айрилиб қолганингизни ўзингиз ҳам билмай қоласиз,жаноблар…

 

 

Биз эса иқтидорсиз прокуратура идоралари ходимлари томонидан  “Ҳасан Чориевнинг жиноят иши”га оид  ниҳоятда хом “ижод” қилинган  сценарийга асосланган воқеалар ривожини кузатамиз.

 

 

“Бирдамлик” Халқ Демократик Ҳаракати Матбуот хизмати

 

 

http://birdamlik.info/?p=29215#more-29215