Oct 182017
 

Дунёнинг бошқа кунжакларида эҳтимол вақтинчалик пропискасиз яшаш мумкиндир.

Бироқ Ўзбекистон пойтахти Тошкентда йўқ. Яшаб бўлмайди.

Пойтахт Тошкент вилоятдан келган келгиндилар учун ёпиқ шаҳар. Жумладан Тошкентда истиқомат қилаётганига 30 йил, чорак асрдан ортиқ вақт бўлаётган бўлса-да, пойтахтга доимий прописка қилаолмаган журналист Малоҳат Эшонқулова учун ҳам.

Журналист ва ҳуқуқбон Малоҳат Эшонқулова Тошкент шаҳрида истиқомат қилаётган қизининг уйида набирасига қарашиб, яшарди.

Бироқ “Бўрижар” маҳалла участка инспектори Миролим Султонов 2017 йилнинг 28 июль куни журналист Малоҳат Эшонқуловани вақтинчалик пропискасиз ўз уйида яшашига изин берганлиги учун унинг қизи Алимбекова Зарнигорни ЎзРесМЖтКнинг “Паспорт тизими қоидаларини бузиш” деб номланувчи 223-моддасининг 2-банди(… фуқароларнинг ўз турар жойларида паспортсиз, вақтинча ёки доимий пропискасиз ёхуд турган жойи бўйича ҳисобда турмаган шахслар яшаб туришига йўл қўйиши)га асосан — энг кам иш ҳақининг ўн баравари миқдорида жаримага тортди.

Ўз онасини уйида яшаши учун изин берганлиги учун боласига жарима!

Бунақаси бошқа элда бўлмаса керак.

Бир ярим миллион сўмлик жаримадан сўнг паспортини вақтинча ҳисобга қўймаса бўлмаслигини тушуниб етган журналист рўйхатдан ўтиш мақсадида Чилонзор туман ИИБ ХЧК ва ФРБга ариза билан мурожаат қилди.

Орадан ўн кунлик муддат ўчгач, Чилонзор туман ИИБ ХЧК ва ФРБ томонидан журналист Эшонқуловага вақтинча рўйхатдан ўтганлиги хусусида ҳужжат берилди.

ID 0003211530 рақамли қайд варақасида Эшонқулова 2017 йилнинг 8 август кунидан то 2018 йилининг 8 февралига қадар турар жойи бўйича ҳисобга олинганлиги тўғрисидаги маълумот қайд этилган эди.

Мана, энди олам гулистон!

Ана энди пойтахтда эркин нафас олса ҳам бўлаверади!

Бироқ Эшонқулованинг “тоза ҳавони сипқориши” кўп узоққа чўзилмади.

Орадан кўп ўтмай, аниқроғи, 28 август куни Эшонқуловани участка инспектори Миролим Султонов йўқлаб келди: “Вақтинчалик рўйхатингизда хатолик ўтиб кетган экан. Ҳужжатингизни олиб паспорт столига бораркансиз, сизни сўрашаяпти” деб қолди.

Аввалига, Эшонқулова участка нозири берган рақамга қўнғироқ қилди: “Ҳа, вақтинчалик пропискангизга оид ҳужжатда хатолик кетибди, келиб, ўша ҳужжатни бизга бериб кетсангиз” деди туман паспорт столи ходими.

Журналист туман паспор бўлимига ёлғиз боргиси келмади.

2017 йилнинг 29 августь куни ўзи билан “Альянс” етакчиси Елена Урлаевани ҳамроҳ қилиб олиб борди.

Эшонқулова Урлаева билан биргаликда Члонзор туман ИИБ ХЧК ва ФРБ инспектори Илҳомов Музаффар Комиловичнинг қабулига кириши билан бошлиқ уни:

  • Эшонқулова, келдингизми? Вақтинчалик рўйхатдан ўтганлигингиз ҳақидаги гувоҳномада хатолик кетган экан. Бу ишга масъул ходимимизга ҳайфсан берилди. Энди хатони тузатиш керак, – дея қарши олди ва журналистдан вақтинчалик пропискасига оид ҳужжатни олиб қоларкан, – Тайёр бўлиши билан ўзимиз хабар берамиз, – дея қўшиб қўйди.

  • Бугун вақтинчалик пропискамга оид ҳужжатимни “тўғрилаймиз” деган баҳонада қайтиб олиб қўйишганларига роппа-роса 21 кун бўлди, – дейди биз билан суҳбатда Эшонқулова. – Ўзлари-ку, “Тайёр, олиб кетишингиз мумкин” дея ҳеч қачон қўнғироқ қилишмайди, биламан. Шу сабаб ўзим вақтинчалик пропискамга оид ҳужжатим тайёр бўлдимикин дея туман ХЧК ва ФРБ га икки маротаба бордим. Йўқ, ҳали тайёр эмас дейишди. Ҳойнаҳой мени вақтинчалик пропискадан мосуво қилишди-ёв. Бу ҳам менга нисбатан қўлланилаёган босимларнинг бир кўриниш, – комил ишонч билан дейди журналист.

Ўзбекистонда яшаб фаолият олиб бораётган мустақил журналист ва ҳуқуқ ҳимоячиси Малоҳат Эшонқуловага нисбатан қўлланилаётган бу каби босимлар, ўйлашимизча, биричиси ҳам, охиргиси ҳам эмас.

Орзигул ХУДОЁРОВА

мустақил журналист

18 октябрь, 2017 йил.