Jun 042017
 

Vatangado, vatanxoini, dangasalar ko’rmasin! Hazil. Абдужалил Бойматов. Видеоблог. (Ватангадо, ватанхоини, дангасалар кўрмасин! Ҳазил).

Мустақил журналист, инсон ҳуқуқлари ҳимоячиси, Ўзбекистон Инсон Ҳуқуқлари Жамияти аъзоси Малоҳат Эшонқулованинг кириш сўзи.

МУЗРАБОД ТУМАН ҲОКИМИ ФЕРМЕР ЎЗЛАШТИРГАН ЕРНИ ХОМТАЛАШ” ҚИЛГАН!

БИР ФЕРМЕР ЕРИНИ 4 ЙИЛ ИЧИДА 5-6 КИШИГА ПУЛЛАБ ЮБОРГАН!

ЕРИ ҚЎЛМА-ҚЎЛ БЎЛИБ КЕТГАН СУРХОНДАРЁЛИК ФЕРМЕР ПРЕЗИДЕНТ ШАВКАТ МИРЗИЁЕВДАН НАЖОТ КУТМОҚДА.

Ўзбекистонда фермерлик қиламан дея ерга меҳр қўйганлардан бири Дилором Зайниева бўлади.

Мана шу, сиз суратда кўриб турган камсуқумгина, одмигина кийинган аёл Сурхондарё вилоятининг Музрабод туманида истиқомат қилувчи Зайниева Дилором Бекмуродовна.

Дилоромнинг падари бузруквори Бекмурод ака Зайниев 40 йилдан ортиқ қишлдоқ хўжалиги соҳасида меҳнат қилган. Умри давомида 60 гектардан ортиқ шўр ерларни ўз ҳиосбидан ўзлаштириб, пахта майдонига айлантирган. Миришкор деҳқоннинг машаққатли меҳнатлари бесамар кетган эмас, уларнинг пешона тери муносиб тақдирланган, Бекмурод Зайниев қаҳрамон унвонига сазовор бўлган қишлоқ хўжалиги вакилларидан бири эди.

Бекмурод ака вафотидан кейин отаси ўзлаштирган ерга ишлов бериш қизи Дилоромнинг гарданига ўтди.

Дилором отаси ўзлаштирган ерга меҳр бериш билангина чекланиб, қаноатланиб қолган эмас. Ота касб дея Дилором Зайниева ҳам 21 гектар шўр ерни ўзлаштириб, ўз ҳисобидан сув чиқарди ва ғалла, пахта ҳосили етиштиришга шайлади.

12 йил давомида фермер хўжалигинини бошқарган Дилором Зайниеванинг бошида кўп ўтмай қора булутлар айлана бошлади.

Фермер аёлнинг иддаосига кўра, ўзининг собиқ турмуш ўртоғи, Музрабод туман кадастр бўлими бошлиғи лавозимида ўтирган Сирож Давлатов шахсий адовати ортидан Дилоромнинг фермер хўжалигини яксон қилишга киришади ва ана шу ғаразмақсадда 2012 йилда Музрабод туман ҳокими Азамат Хўжамқулов билан ўзоро жиноий тил бириктирган ҳолда сохта ва ёлғон далолатномалар асосида ноқонуний тарзда Дилором Зайниева ерини тортиб оладилар.

Янаям ҳайратланарли томони шундаки, Дилоромдан тортиб олинган 56,6 гектар ер Музробод туман ҳокими Азамат Хўжамқулов томонидан 2012 йилдан то 2016 йилга қадар, яъни шу ўтган 4 йил ичида 5-6 нафар фермерга пуллаб юборилади. Яъни ҳоким Дилором Зайниевадан ноқонуий тарзда олиб қўйган ерни қисқа 4 йил ичида 5-6 кишига “эҳсон” қилиш тўғрисида қарор чиқаради.

Энг ачинарлиси, Дилоромнинг фермерлик ери пахта ва ғалла уруғини қадаб, парвариш қилаётган айни кезларида турли уйдирмалар ортидан ғайриқонуний тарзда тортиб олинди ва туман ҳоким Хўжамқўлов илк бор Дилором ва унинг марҳум отаси ўзлаштирган ерни “Бургандарё Музрабод” фермер хўжалиги раиси Мирсаид Олимовга “ҳадя” этиш тўғрисида қарор чиқарди.

Аммо Мирсаид Олимов ҳоким Азамат Хўжамқуловнинг ишончини оқлай олмади ва натижада 2012 йилда етиштирилган пахта ҳосили худди мана шу тариқа нес-нобут этилди.

Орадан олти ой ўтиб-ўтмай, ҳоким Аъзамат Хўжамқулов Мирсаид Олимовдан мазкур ерни қайтиб олиб, 2013 йилда “Акобир Абубакиров” фермер хўжалигига “эҳсон” қилиб юбориш тўғрисидаги яна бир ноқонуний қарорига жимжимадор имзо чекди. Орадан кўп ўтмай, аниқроғи, 2014 йилнинг февраль ойида Дилормнинг марҳум отаси ўзлаштирган ер ҳоким ҳукми билан “Раззоқ мулк” фермер ҳўжалиги ихтиёрига ўтиб кетди. 2014 йилнинг охирига келиб, Музробод туман ҳокими Азамат Хўжамқуловга яна соққа керак бўлиб қолди чоғи, декбарь ойида ер “Раззоқ Мулк” фермер хўжалигидан тортиб олиниб, “Бадал Авазжўра” фермер хўжалигига тортиқ этилди. Саналарга эътибор қаратинг, ҳоким биргина ерни бир йилнинг ўзида, яъни бошида бир фермерга инъом этган бўлса, йил охирига келиб иккинчи фермерга ҳадя қилиб юбормоқда. 2015 йилга келиб мазкур ер ҳоким “фатвоси”га асосан яна хомталаш этилди ва 56, 6 гектарнинг 20 гектари бу сафар “Ражабий” фермер хўжалиги ихтиёрига ўтказилди.

Музрабод туман собиқ ҳокими Азамат Хўжамқуловнинг ўз мансаб ваколатини суиистеъмол этишининг оқибатида фермер Дилором Зайниева барча тенгдош хотин қизлари қаторида ўйнаб-кулиш, одамдек яшаш ўрнига субитсиз ҳокимдан отаси раҳматлик ўзлаштирган ерни қайтариб олиб, фермерлик қилиш истагида мана, 5 йилдирки судлар остонасида сарғайиб бебаҳо умрини ўтказмоқда.

Аммо фермер аёлнинг дардини, шикоятини эшитадиган бирорта бир раҳбар топилмади. Дилоромнинг қўли ҳамон калталик қилмоқда.

Тўғри, президент Шавкат Мирзиёев ишонч билдириб Сурхондарё вилоятига Эркин Турдимовни ҳоким этиб тайинланди.

Бироқ, “Янги вилоят Ҳокими Эркин Турдимов “Президентга ёзиб қўлингиздан нима келди, барибир кунингиз бизга қоларканку? Нега яна олдимга келдингиз? Сизнинг ишингиз ҳал бўлмайдиган иш! Президентга минг бор борганингиз билан муаммонгиз ҳал бўлмайди. Ишингизни Мирзиёев эмас, биз ҳал қилиб берамиз. Кўп гапирганингиз учун ҳам ишингиз битмайди, аёл киши кўп гапирмайди” деб устимдан очиқчасига кулиб, ҳатто қабулига киришимга ҳам изин бермасдан, қабулхонасидан қувиб солди” дейди ноумид бўлган фермер Дилором Зайниева.

Қизиғи шундаки, Музрабод туманига яқингинада ҳоким этиб тайинланган Улуғбек Қосимов ҳам негадир Дилором Зайниевага ерларини қайтариб беришга ҳафсала қилмаётир.

Адолат излаб топаолмаяётган фермер аёл “Мен президент порталига юз бор арз қилдим, фойдаси бўлмаяпти” дея изтиробга тушмоқда.

Шу кеча-кундузда Зайниева Ўзбекистон Президентининг расмий веб сайтига – такрор мурожаат қилди.

Узоқ сурхондарёдан минг километр масофа босиб фермер Зайниева Мирзиёевнинг қабулига кириш ниятида адолат қарор топишига умид билан Тошкентга ҳар ойда уч-тўрт бор бўзчинининг мокисидек қатнамоқда. Бироқ, ҳозирча, натижа йўқ.

Умидлари саробга айланиб бораётганини ҳис қилган фермер аёл Мирзиёевга оҳларини видеомурожаат орқали бўлса-да етказишга бел боғлади: Қуйида собиқ турмуш ўртоғи, яъни Музрабод туман Кадастр бўлими бошлиғи Сирож Давлатовнинг шахсий адовати туфайли Сурхондарё вилояти ва туман ҳокимларининг қўли билан фермерлик хўжалиги яксон этилган Дилором Зайниеванинг президент Шавкат Миромонович Мирзиёевга мурожаатини тинглашингиз мумкин: