МУХОЛИФАТ БИРЛАШАДИМИ?

Абдужалил Бойматовнинг мухолифатни жиддий, кучли ташкилотларга айлантириш учун берган тавсияларига аксарият муҳолифат лидерларининг ҳеч қандай муносабат билдирмаганлиги бизни ўйлантириб қўйди. Ё булар ўз манфаатларини ўйлаб четга чиқиб кетган, ёки буларнинг кўпчилиги ўзлари билиб-билмай хукуматга ҳизмат қилаяпти. Ахир халқнинг бугуни ва келажагини ўйлаган кишилар ўзларининг шахсий ғаразларини бир томонга йиғиштириб қўйиб, фақат халқ манфаатлари йўлида бирлашишни асосий мақсад қилиб олмайдими.

Абдураҳим Пўлатов шу ердалигида биргина Муҳаммад Солиҳни эмас, балки давлат ташкилотида ишлагани ва М.Солиҳ билан муносабати яҳши бўлганлиги учунгина Мамадали Маҳмудовни ҳам сотқинга чиқарган эди. Мен бу гапларни Мамадали ака Наманганга келганларида айтсам, -Бундай гапларга эътибор берманглар-деб жавоб берган эдилар. Бу ерда гап фақат М.Солиҳ ҳақида кетаётгани йўқ. Лекин айнан А.Пўлатов бошлаб берган мана шу фитна ҳозирга келиб бутун мухолифатни парокандага айлантирди. Абдураҳим бу ишини бугун ҳам давом эттираяпти.

Абдураҳим доимо “Озодлик” радиосида бошини кундага қўйиб ишлаётган укаларимизни Муҳаммад Солиҳга хайриҳоҳ сифатида кўриб, уларнинг ҳаммасини СНБнинг одами дерди. Мен бу фикрига қарши чиққаним учун мени ҳам сотқинга чиқарди. Таниқли жўрналист Анвар ака Усмонов айнан “Озодлик”ка интервью бериб турганлиги учун уни ҳам сотқинга чиқарди.

Охир оқибат “Бирлик” партияси келажагидан ташвишга тушиб собиқ СССР халқ депутати, таниқли сиёсатчи Пўлатжон Охунов, Пўлатов билан боғланиб,- Ака айнан сизнинг ҳадди ҳаракатларингиз туфайли аксарият фаоллар партия сафларидан чиқиб кетаяпти. Низом бўйича сиз ноқонуний равишда партиянинг раиси бўлиб турибсиз. Жон ака истеъфо беринг!Бўлмаса партия тугайди!-деганлиги учун, “сен мени ўрнимни олишга ҳаракат қилаяпсан”,-деб шундай покиза қалбли Пўлатжонни ҳам сотқинга чиқарди. Ҳозирда айнан П.Охунов сайъи ҳаракатлари билан “Бирлик”чилар унинг атрофида бирлашмоқда.Бунга шахсан ўзим гувоҳ бўлиб турибман.Масалан Наманганда яқин кунларда улар йиғин ўтказишмоқчи.

Мухолифатни бирлаштириш масаласи ўртага чиқар экан,биз бугун Абдураҳим Пўлатов сингари мухолифат фолиятига зарба берувчи, фақат ўзининг манфаатини ўйлайдиган телбанамо шахслардан қутилишимиз керак.Улар аллақачон сиёсий ўликка айланиб бўлган.Бунга ўхшаган шахслар ўта ҳавфли бўлиб муҳолифат билан бирга халқимизнинг ҳам келажагига таҳдид солиши муқаррар.

Носир Зокир

Ўзбекистон Инсон Ҳуқуқлари Жамиятининг Фарғона водийси бўйича мувофиқлаштирувчиси

  6- январь, 2014-йил.