Jun 142012
 

Бугун Женевадаги Бирлашган Миллатлар Ташкилоти Бош Қароргоҳи олдида Европада яшаётган бир гуруҳ ўзбеклар Қирғизистонда ўзбекларга нисбатан давом этаётган зўравонликларни қоралаб норозилик пикети ўтказдилар. Пикетда иштирок этган ўндан ошиқ фаоллар Қирғизистонда миллатчилик ва фашистик гуруҳларни дастаклаётган ҳукуматга қарши кескин чоралар кўришни талаб қилиб чиқишган эди.

БМТдек халқаро ва нуфузли ташкилот биноси қаршисида турли талаблар ёзилган плакатларни кўтариб турган кишилар орасида Қирғизистондаги Ўзбек Миллий жамияти вице президенти, айни пайтда Швециядан сиёсий бошпана олган Қодиржон Ботиров ҳам бор.

-Қирғизистонда бўлиб ўтган 2010 йилнинг июнь ойидаги қонли воқеалар ташкилотчилари албатта жазога тортилиши керак. Бизнинг мақсадимиз БМТ ни Қирғизистон ҳукуматига қарши кескин чоралар кўришга даъват этишдир. Чунки, ҳозирги ҳукумат халқаро ташкилотларнинг ўзбекларга нисбатан зўравонликларни тўхтатиш борасидаги чақириқларига қулоқ солмай келмоқда. Ҳамон ўзбекларни айбдор қилиб кўрсатиш қирғиз ҳуқуқ тартибот идоралари учун урфга айланди. Айбдорлар жазоланмас экан, бизни ватанимизда тинчлик бўлмайди. Биз сиёсий йўллар билан курашни давом эттираверамиз”, -дейди Қодиржон Ботиров.

Пикет иштирокчиси,Ҳуқуқ Ҳимоячилари халқаро Жамияти раиси Муҳиддин Қурбоновнинг фикрича, Қирғизистонда ўзбеклар ҳуқуқларини тиклаш, турли миллатчи гуруҳларни фаолияnига чек қўйиш борасида қирғиз ҳукумати деярли бирор ҳаракат қилаётгани йўқ.

-Қирғизистонда ўзбекларга нисбатан амалга оширилган қатлиом ҳеч қачон дунё жамоатчилигини хотирасидан ўчмайди. Ҳозирги қирғиз ҳукумати бу қатлиом учун албатта жазоланиши керак. Лекин ўтган икки йил давомида биз ўзбекларга қарши зўравонликлар тўхтамаётганидан қаттиқ ташвишдамиз. Бу вазиятни янада чигаллаштиради холос. Чунки, муаммоларни зўравонлик йўли билан ҳал қилиб бўлмаслигига тарих гувоҳдир”, дейди Муҳиддин Қурбонов.

Пикет иштирокчилари фикрича 2010 йилнинг 10 ва 13 июнь кунлари жанубий Қирғизистоннинг Ўш ва Жалолобод вилоятларида маҳаллий ўзбекларга қарши амалга оширилган кўз кўриб қулоқ эшитмаган даҳшатли қирғин халқаро комияссия томонидан инсониятга қарши жиноят билан тенглаштирилган эди. Қирғиз ҳукумати эса қонли воқеаларда ўзбек миллий жамиятлари лидерларини айблаб келади.

Женевадаги БМТ Бош Қароргоҳи биноси олдида бошланган норозилик акцияси эртага ҳам давом этади.

“Янги Дунё” учун Юсуф Расул, Женевадан.

http://yangidunyo.com/?p=1512

Sorry, the comment form is closed at this time.